زوجة المقدم أحمد أبو الدهب: الرئيس السيسى أب لكل أبناء الشهداء

"قول لبابا فى التليفون أن بطنك بتوجعك أوى عشان ييجى بسرعة" هذا ما قالته بيسان – عُمرها أقل من 5 سنوات - بنت الشهيد المقدم أحمد أبو الدهب - أحد شهداء الواجب - لتوأمها مصطفى، فى بداية لقاء "انفراد" مع أسرة البطل، الذى استشهد فى 26 سبتمبر 2013، إثر إطلاق بلطجى عيار خرطوش عليه ليصيبه فى رأسه، وقال "محمد" الابن الأكبر للشهيد: عاوز أطلع ضابط شرطة، علشان أقتل المجرمين اللى قتلوا بابا. قالت منى أمين عبد العزيز - زوجة الشهيد – دائمًا يُوصى الرئيس فى خطاباته بضرورة الاهتمام بأسر الشهداء، لذلك نثق فى الرئيس، وتابعت: قابلنا الرئيس السيسى بعد استشهاد زوجى، وابنى محمد الكبير كان مبسوط جدًا، وزمايله فى المدرسة والمدرسين قالوا له أنت اتكرّمت، ودلوقتى لما بيعرض صورته مع الرئيس السيسى على فيسبوك بيبقى مبسوط جدًا وبيفتخر بالصورة، والرئيس السيسى إنسان، ربنا يرزقه الصحة، هو أب لكل أبناء الشهداء، وقال لنا متخافوش أنا جمبكم ومعاكم. زوجة الشهيد: أطال الله فى عُمر الرئيس السيسى أضافت: أتقدم بكل الشكر والتقدير لسيادة الرئيس عبد الفتاح السيسى أطال الله فى عُمره وحفظه من كل مكروه، وكذلك وزير الداخلية اللواء مجدى عبد الغفار، وكل رجال الشرطة الشرفاء الأبطال، نقدر تضحياتكم لنعيش فى أمن وأمان، وتحيا بكم مصر حرة أبيّة، وتحيا مصر. مشروع التخرج فى كلية الاعلام وأضافت زوجة الشهيد قائلة: كنت بعمل مشروع تخرجى بكلية الإعلام عن المخدرات، فى العام الدراسى 2003- 2004، وكان والدى لواء شرطة وعرّفنى على زملاؤه بإدارة مكافحة المخدرات، وتعرّفت على المقدم أحمد أبو الدهب، وساعدنى فى مشروع التخرج، بعدها اتقدّملى، واتخطبنا سنة، واتجوّزنا. الشهيد من مواليد 21 يونيو 1976، وكان مُتديّن وكان بيحب بلده جدًا، وكان متفائل أن مصر هتتقدم وهتبقى أحسن، وكل الناس كانت بتحبه، وكان بيصلى كل الفروض بدون تأخير، وكان بيصلى الفجر حاضر فى الجامع. البطل كان بيتمنى دايمًا يبقى شهيد وتابعت منى زوجة الشهيد المقدم أحمد أبو الدهب: قبل استشهاد زوجى مباشرة، استشهد اللواء نبيل فراج، وقال يا بخته ياريت أنا كمان أبقى شهيد، وكان بيوصينى باستمرار بالاهتمام بأبنائنا إذا استشهد، وكان بيقول لى: عايزك تبقى قوية وتبقى راجل مع ولادنا، أنا عايش ميّت بسبب مهنتى، هو اختار بنفسه العمل بوزارة الداخلية، وكان مُتحمّس وبيحب شغله وكان بيشارك فى مأموريات خطيرة، بسبب عمله فى مكافحة المخدرات، كان يتنكر فى زى سواق نقل مثلاً أو بوّاب، ويركّب دقن ويلبس جلابية، وكنت بسمعه بيتكلم مع ناس بتهدده بالقتل، لكن كان بيرفض يقول لى على التفاصيل عشان مقلقش. ابن البطل عايز يبقى ضابط شرطة زى والده وقالت زوجة الشهيد: محمد ابنى الكبير - طالب فى الصف الأول الإعدادى - لما والده استشهد قال لى عاوز أطلع ضابط شرطة زى بابا علشان أقتل المجرمين اللى قتلوه، ربنا يبارك فيه هو وأخوته لوجين طالبة فى الصف الرابع الإبتدائى، ومصطفى وبيسان توأم، ساعات بسمعهم بيتكلموا مع بعض عن والدهم الشهيد، يعنى مثلاً محمد ابنى الكبير كان بيقول لـ "لوجى" أخته: لو بابا رجع تانى هتعملى إيه ؟ قالت له هفضل ماسكة فى إيده جامد عشان مايسبناش ويمشى تانى. بيسان لتوأمها: قول لبابا بطنك بتوجعك عشان ييجى وأشارت منى أمين عبد العزيز- زوجة الشهيد المقدم أحمد أبو الدهب إلى أن طفليها مصطفى وبيسان، كانا يلعبان بالريموت، كإنه تليفون، مصطفى قال أيوة يا بابا تعالى، أنا تعبان، أخته قالت له قول لبابا بطنك بتوجعك أوى عشان ييجى بسرعة. "طبعاً ولادى بيفتكروا والدهم على طول، لأنه كان حنيّن عليهم جداً، رغم أن إللى بيشتغل الشغلانة ده طبيعته يبقى قوى وعنيف، لكن أحمد كان شغله حاجة، وبيته وولاده حاجة تانية". ابن الشهيد: بابا وحشنا أوى بس هو فى مكان أحسن بالجنة من جانبه قال "محمد" نجل الشهيد، أن والده كان طيب جدا، مضيفا: كنا مرتبطين به، وهو وحشنا أوى، بس هو فى مكان أحسن، لأنه فى الجنة، وكان دايمًا يوصينى على ماما وأخواتى، إنى آخد بالى منهم، لأنه كان بيتمنى الشهادة دايمًا، وكان حاسس أنه هيبقى شهيد. بس لما كان بياخد أجازة، كنا بنتبسط أوى معاه، ومكانش بياخد إجازة فى العيد، كان بياخد الإجازة بعد العيد دايمًا، وساعات كنا بنقول له إحنا خايفين عليك، و كنا قلقانين عليه دايمًا، بس هو كان عايز يبقى شهيد. والدة زوجة الشهيد: أحمد كان زى ابنى من جانبها قالت السيدة هانم على جعفر، والدة زوجة الشهيد، أنها تحتسب أحمد عند الله شهيداً، حسبى الله ونعم الوكيل، ربنا يرحمه ويحسن إليه، أحمد كان زى ابنى، وكان مُحترم مع كل الناس، وكان خلوق وطيب جداً، ولم يخف يوماً من أى شىء، وكنت أتعجّب من شجاعته الزائدة، وكان بيقول وهو رايح الشغل: "توكلت على الله". استشهاد المقدم أحمد أبو الدهب فى 2013 جدير بالذكر أن المقدم أحمد أبو الدهب، الضابط بإدارة شرطة نجدة الجيزة، استشهد أثناء إنقاذ فتاتين بالهرم أثناء محاولة 3 بلطجية لسرقتهما بالإكراه، وأطلق بلطجى عيار خرطوش عليه ليصيبه فى رأسه، وتم نقله إلى المستشفى فى حالة خطرة وتوفى بداخلها متأثرًا بإصابته، وعُمره 38 سنة، يوم الخميس الموافق 26 سبتمبر 2013، وتم دفن جثمان الشهيد المقدم أحمد أبو الدهب بمسقط رأسه، بقرية المدمر بمدينة طما فى سوهاج.