أحياناَ ما تكون الصدفة هى الطريق الوحيد لكشف اللغز الذى يعجز رجال الأمن عن الوصول إليه، كما أن سوء الحظ يؤدى حالياَ إلى وقوع اللصوص والمجرمين فى قبضة الأمن، مثلما حدث مع كل من "حسام.ح.م" 32 سنة، و"أحمد.ج.ع" 44 سنة، عاملى رخام، سوهاج، اللذان وقعا فى قبضة رجال الأمن على خلفية اتهامهما بتكوين تشكيلا عصابيا تخصص فى سرقة سيارات التاكسى بروض الفرج.
وروى "حمدى فتحى حميدة"، سائق تاكسى، فى تحقيقات النيابة العامة التى أجراها المستشار شادى سيف، وكيل النائب العام، أشرف عليها المستشار محمد عادل، رئيس نيابة روض الفرج، فى القضية المقيدة برقم 2270 لسنة 2016 إدارى روض الفرج، تفاصيل الواقعة، حيث أكد: " اللى حصل إنى من 5 أيام بالظبط كنت ماشى بالتاكسى اللى بشتغل عليه فوق الدائرى، راح اتنين شاورولى وطلبوا منى أوصلهم لسجن طره، وفضلوا يتكلموا معايا ويضحكوا بحجة إنهم بيتسلوا لغية ما يوصلوا مشوارهم".
وأضاف المجنى عليه: "وأنا فى الطريق لقيت واحد منهم طلع مسدس والتانى طلع مطواه، وهددونى وقالولى اطلع على طريق الصف، وبالفعل استجبت ليهم بعد تهديدهم ليا بإنهم هيموتونى لو مسمعتش الكلام، وفهمت ساعتها أن القصة قصة سرقة العربية، وقولتلهم أنا هعملكوا اللى إنتوا عاوزينه بس متأذونيش، وأول ما وصلنا على طريق الصف خلونى دخلت مدق فى طريق زراعى".
وأشار حميدة: "وأول ما وصلنا بدأوا يتكلموا فى التليفونات ويقولوا إحنا خلاص وصلنا ومعانا المصلحة، وجهزوا الرجالة، ساعتها لقيت فى 3 رجالة ملثمين، وقاموا ضربونى وخدوا تليفونى والفلوس اللى معايا والتاكسى ومشيوا، قمت طالع على قسم الشرطة وحررت محضر بالواقعة فى الصف، وطبعاَ الراجل صاحب التاكسى مشانى وطردنى من عنده لأنى اتسببت فى سرقة التاكسى بتاعه، بعدها عرفت أنهم اتصلوا بصاحب التاكسى وطالبوا منه 20 ألف جنيه ويستلم التاكسى، واتفقوا على المعاد والزمان".
وتابع: "أنا ساعتها كنت ركبت تاكسى تانى، وبعد الواقعة بـ4 أيام لقيت حاجة غريبة لو شوفتها فى الأفلام مش ممكن أصدقها ولو حكتها لحد ممكن يقولى إنت بتكدب، لقيت الأثنين اللى خدونى فى الصف وسرقوا منى التاكسى، بيوقفونى فى منطقة روض الفرج وأنا سايق التاكسى، ساعتها نزلت من التاكسى بسرعة وهما مكنوش مركزين فى وشى، وقمت ماسك واحد منهم والتانى حاول يهرب بس الناس اللى فى الشارع قدرت تقبض عليه لما فضلت أصرخ وأقول حرامى، وقمنا وخدينهم على القسم، وحررت المحضر، وطلعت حملة من قسم شرطة روض الفرج بعد اعترافهم بالواقعة، وطلعوا بينا على منطقة الصف، واقتحموا مخزن يتم فيه تخزين السيارات، والحمد لله لقيت التاكسى بتاعى هناك".
من جانبه، قرر المستشار شادى سيف، وكيل النائب العام، وبإشراف المستشار محمد عادل، رئيس نيابة روض الفرج، حبس عاملى رخام، 4 أيام على ذمة التحقيقات، على خلفية اتهامهما بتكوين تشكيل عصابى تخصص فى سرقة التاكسى الأبيض بروض الفرج، كما أمر بضبط وإحضار "إيهاب.ع"، "محمد.ا"، "أبو زيد.ه"، لتورطهم فى الواقعة.