بدأ الكابتن مدحت شلبى كلمته لطلاب إعلام عين شمس بكلمته الشهيرة "يا مساء الأنوار عليكوا"، مضيفًا للطلاب "جتلكوا جرى عشان أنتوا المستقبل والمدرج كله بنات مفيش ولاد ليه هى البنات مسيطرة على الكلية"، لافتًا إلى أن الإعلام الرياضى لابد وأن يكون محايدًا، "فعليكم أن ترتدوا ثوب الحيادية، وبرة الإعلام شجع اللى أنت عايزه".
وأضاف الكابتن مدحت شلبى، خلال ندوة "الإعلام الرياضى فى مصر" والتى ينظمها قسم علوم الاتصال والإعلام بكلية الآداب جامعة عين شمس داخل مدرج غربال بالكلية، قائلاً "شايف مستقبل جميل جوا كل واحد فيكم، والحلم ممكن يبقى حقيقة، وكل واحد جواه حلم والحلم مش مستحيل".
وسرد الكابتن مدحت شلبى تجربته للوصول إلى الإعلام وأنه حاصل على ليسانس حقوق جامعة عين شمس وبكالوريوس شرطة، قائلاً "لما بدأت حياتى ولا فى دماغى خالص أنى أبقى إعلامى، لكن كنت بلعب كرة، وأنا عندى 30 سنة قريت فى التليفزيون عاوزين مذيعين ومذيعات وأصدقائى أقنعونى ولقيت طوابير طويلة عريضة بتقدم وكنت يومها ضابط وقفت 3 أو 4 ساعات عشان أقدم، وبعد ما عدى شهر ونص لقيت جواب جالى على البيت".
وأضاف الكابتن مدحت شلبى، خلال الندوة، "الحظ والقسمة والنصيب موجودين فى حياتنا بشكل عام"، مداعبًا الدكتورة هبة شاهين رئيس قسم الاتصال والإعلام، قائلاً "حرف الهه فى البنات جميل"، مشيرًا "أول يوم رحت أقدم نشرة، الأسانسير اتعطل 50 دقيقة بىَّ، وجالى فوبيا من الأماكن المغلقة".