راكبة توثق رحلتها على متن القطار الروسى: أرخص وأسرع مواصلة والتعقيم 3 مرات

وثّقت إحدى الراكبات رحلتها على متن القطار الروسي الذي دخل الخدمة مؤخرا، معتبرة أن هذا القطار يعتبر أرخص وسيلة مواصلات وأسرعها أيضا، مؤكدة أنه تم تعقيم القطار أكثر من ثلاث مرات أثناء رحلتها من القاهرة إلى الزقازيق، فيما بلغت تكلفة التذكرة 15 جنيها فقط. ونشرت المواطنة مي قنديل، عبر صفحتها الشخصية على "فيسبوك"، صورا توثق رحلتها من رمسيس إلى الزقازيق، معلقة: "إيه الحلاوة دي يا مصر.. القطار الروسي السريع.. القطر جديد يا شباب النهاردة، تاني يوم خدمة له من القاهرة آخره الإسماعيلية.. التيكيت من محطة رمسيس القاهرة لمحطة قطار الزقازيق بـ15 جنيه". وأضافت: "يعتبر أرخص من أي مواصلة وأسرع وأأمن، والشبابيك عازلة للصوت.. يعني لا صداع ولا تراب ولا برد.. وبدل البياعين الجائلين في خدمة شخص ماشي بترولي زي اللي في الطيارة ولا بس يونيفورم جميل وعلى الترولي دي شاي وحاجة ساقعة وعصير وساندوتشات... لباتيه جبنة بـ4 ج والشيكولاته بـ5 ج". وتابعت: "كل شوية بضيف تعديل من اللي بشوفه.. عدا علينا مسؤول التعقيم 3 مرات.. بيعقموا القطر يابا الحج.. وصورتلكم الحمامات لزوم الإجابة عن جميع اللي ممكن يخطر ببالكم على كل عربية مسؤول أمن، ونضافة الحجز من شباك التذاكر برقم الكرسي ورقم العربية.. البدائل ميكروباص بـ5 جنيه من رمسيس لموقف عبود ومن عبود للزقازيق لو بيجو 17 جنيه لموقف الأحرار ومن الأحرار لمحطة الزقازيق بـ 2 جنيه، يعني الإجمالي 24 جنيه، لو ميكروباص من رمسيس للسلام 7 جنيه، ومن موقف السلام لموقف الأحرار بـ17 ج، ومن الأحرار لمحطة قطار الزقازيق بـ2 جنيه يعني الإجمالي 26 جنيه".