"فتش فى دفاترك القديمة".. ربما ستجد ما ينفعك ويحدد مصير حياتك ولا توقف عقلك على ما أنت فيه الآن فالفكرة تبدأ بتجربة فإذا نجحت "هيلعب معاك الزهر".
شباب لم يتوقف عقولهم عند باب التخرج والانتظار على القهاوى يوميا لحين ميسرة.. بل تحدوا الصعاب وواجهوا الحياة بكل مشاقها بحثا عن لقمة العيش الحلال.. فلم يمنعهم "البكالريوس" عن الوقوف على الرصيف ويبع القهوة للزبائن.
أفكار إبداعية يطلقها شباب مصر بين الحين والآخر، لكن أغلبها يتوقّف بطريقة أو بأخرى، جراء بعض الصعوبات التى تعيقهم من جانب آخر.
مشروع "سبرتايه" بدأ بفكرة من والدتى لما شوفتها بتعملى القهوة اللى بحبها على "السبرتايه" فمن هنا جاءت الفكرة ثم بدأنا التجربة ثم وصلنا للنجاح .. هكذا بدأ محمد حديثه لـ"فيديو 7".. وكانت هذه هى القصة كاملة ..
بداية الفكرة..
"الفكرة كلها اننا بنحب نشرب قهوة فا بننزل الشارع مش بنعرف نشرب قهوة كويسة فى أى مكان.. وأنا قاعد فى البيت والدتى كانت بتعمل القهوة على السبرتايه ومن هنا جتلنا الفكرة لأن السبرتايه تبدى طعم أحلى للقهوة إلى جانب الخامات النظيفة".
"الشراكة حلوة مفيش كلام"..
"احنا 2 شركاء".. أنا محمد عادل 25 سنة حاصل على بكالريوس هندسة وأنا محمد عمر 29 سنة الشريك الآخر لمحمد وحاصل على بكالريوس خدمة اجتماعية".
"اللى مستنى وظيفة الحكومة.. ميستناش"
"مفكرتش أتوظف بالشهادة بتاعتى .. كان صعب جدا وحاولنا .. حاولنا ومفيش حد بيشتغل بشهادته.. وفى الزمن اللى احنا فيه ده لازم الواحد يشتغل حاجتين عشان يعرف يصرف على بيته".
"هنطور الفكرة وهنكبر زى الكافيهات العالمية.."
مشروعنا بدأ فى 23/8/2016.. وبنسعى اننا نطور الفكرة وبدأنا نعمل فرع تانى والقهوة هيبقى ليها طعم تانى خالص وانتوا بتشربوها عندنا.. هنطور الفكرة وهنكبر زى الكافيهات العالمية".
"أنواع المشاريب عندنا".
بنقدم جميع أنواع البن بالأنواع المختلفة للقهوة.. لأنه أساس المشروع بجانب إلى مشروبات أخرى كالعصائر والأعشاب والشاى "البراد" لأنه ليه زبونه الخاص.
"مشاكلنا"..
"عندنا مشاكل بتواجهنا زى البلدية والحى والمفروض انهم يقفوا جنب الشباب اللى بيسعى .. وعشان احنا واقفين فى الشارع قررت اننا منكنش مخالفين واحنا اللى بنعمل مصدر الطاقة بتاعنا ومفيش حد بيشتكى مننا والناس بتتفاعل معانا بطريقة جميلة".
"رسالة للشباب.. اسعوا وجربوا".
اسعوا وانزلوا اشتغلوا مش شرط تشتغل بشهادتك .. ممكن تشتغل فى أى حاجة انا الفكرة دية جاتلى من مجرد انى فكرت اشرب قهوة وانزل الشارع وجرب وهتلاقى اللى هيساعد وهيسندك انزل انت بس .