على صفحته بفيس بوك ، كتب المواطن محمد وزيرى عن مشكلة إلقاء الصرف الصحى بالنيل فى محافظة أسوان، وشرح الحكاية ولخصها فى هذه السطور.
.jpg "2(5283)")
السنه اللى فاتت زى الأيام دى كان المهندس إبراهيم محلب رئيسا للوزراء ، وكان فى زياره لأسوان ، فقام مغير مسار الزياره وطلع على محطة معالجة مياه الصرف الصحى بمنطقة كيما ، لمتابعة المشروع اللى حيمنع كارثة إلقاء مية الصرف الصحى فى نهر النيل (100 ألف متر مكعب من مياه الصرف الصحى يوميا بتصرف فى النيل) ، المهم الشغل معجبش البشمهندس محلب ، فوّقع غرامه على الشركه المنفذه ، وقالهم حرام عليكم ده مشروع مهم جداً ولازم يخلص بسرعه ، وبالفعل خلصوه بسرعه ، وبعد شهرين راح محافظ أسوان عشان يحتفل بالمشروع ،ويشغل المحطات اللى حترفع مية الصرف الصرف الصحى من مصرف السيل ،اللى بيرمى فى النيل ويستفادوا منها فى زراعة 5 آلاف فدان غابات شجريه ،وتنتهى إلى الأبد مشكلة تلوث النيل ، وبعد ماشغل المحافظ الطلمبات بساعه ،غرقوا المحطتين فى شبر مية ، ورجعت "كيما" لعادتها القديمه ،وكل يوم تترمى إلـ 100 ألف متر مكعب مية الصرف الصحى والصناعى فى النيل ،الرائحه العفنه فى مدخل أسوان تجيب 60 مرض ، فمابالك بمية الصرف اللى بتترمى فى النهر مباشرة !!
المهم فى زيارته الأخيره لأسوان ،البشمهندس عمل نفسه من بنها ، ولا كأنه فيه مشكله خطيره تهدد ملايين المصريين بأخطر الأمراض من تلوث نهر النيل.
