بالصور.. طفل يترك أسرته هربا من التسول.. ويؤكد:"مش عاوز أرجع تانى"

"أنا مش عايز أرجع لأبويا تانى، هيرجعنى أشحت فى الشارع، واللى بيشحت من الناس بيجى يوم القيامة يقابل ربنا تكون ايده سودة، أنا كنت فى المدرسة فى سنة خمسة ابتدائي، وهربت من الصعيد إلى الزقازيق فى القطار، نمت فيه لاقيت نفسى فى محطة قطار الزقازيق". بهذه الكلمات قص الطفل "حسن زهير الشعراوى" 10 سنوات، مأساته وقصة هروبه أكثر من مرة من منزله إلى عدد من المحافظات، هاربا من الفقر والتسول الذى أجبره والده عليه كما قال الطفل. قال حسن، "كان نفسى أطلع حاجة كويسة، بس أبويا بيضربنى كتير وأمى كمان ولى 9 أخوات، قبل كدا هربت ورحت الجيرة وإسكندرية والناس رجعتنى عن طريق قسم الشرطة لأبويا، ورجع ضربنى تانى، عشان أشحت من الناس فى الشارع، وأنا كنت بشحت مرة فى الجيزة، قابلنى حد كويس قالى يا ابنى اللى بيشحت يوم القيامة بيقابل ربنا بتكون إيده سودة". وتابع الطفل حديثه قائلاً "ربنا يخليكى مش عايز أرجع لأبويا تاني، عايز أستنى هنا مع استاذ محمود بتاع الدار، إمبارح خدنى فسحنى واشترالى حاجات حلوة، وعايز أروح أتعلم من جديد، بس أهم حاجة مش ترجعونى لأبويا تانى لأنه كل ما يشوفنى يضربني، أبوس إيدكم مش ترجعونى لأبويا تانى". من جانبه، أضاف محمود درج، المدير المسئول عن دار بسمة لإيواء المتشردين، أنه وردت إليه رسالة من أحد المواطنين بإنقاذ طفل متشرد، ينام فى القطارات فى محطة قطار الزقازيق، ويقوم بالتسول بالنهار. وأشار درج، إلى أنه توجه على الفور وبرفقته أحد مسئولى الدار، إلى محطة القطار، وتقابل مع الطفل ويدعي" حسن" عمره 10 سنوات، وتبين أنه من محافظة المنيا، هارب من أسرته بسبب الفقر وإجبار والده له على التسول، بعد إخراجه من المدرسة من الصف الخامس الابتدائى. وأوضح مدير دار بسمة، بأنه مشترك فى جميع صفحات المفقودين على مواقع التواصل الاجتماعى، وبمجرد نشره قصة الطفل "حسن" وصورته، تواصل معه عدد كبير من المواطنين من محافظات الإسكندرية والجيزة والصعيد، وأرسلوا صور للطفل قديمة تؤكد أنه متكرر الهروب أكثر من مرة، وأنه تم التواصل مع والده ورفض استلامه، وأن مركز شرطة سمالوط بمديرية أمن المنيا، سلم الطفل لوالده، وتركه فهرب الطفل منه، وذلك لأن الأب متسول، ولديه 10 أطفال، أغلبهم يتسولون. ولفت مدير الدار إلى أن الطفل سيظل فى الدار، وخاصة أنه رافض العودة لأسرته، وسوف يتم استخراج شهادة ميلاد للطفل، للعمل على عودته للدراسة، فضلا عن إعادة تأهيله نفسيا، من خلال أطباء نفسيين.