برة الملعب.. يسرا حلمى بطلة منتخب تنس الطاولة: أنا فى المطبخ زيرو.. وبحب أمينة خليل

بعيداً عن الرياضة وملاعبها وصالات المنافسات، هناك جانب آخر فى حياة اللاعبات على صعيد الألعاب الفردية أو الجماعية، هذا الجانب تتجرد فيه اللاعبات من البطولات والألقاب التى تحققها، ويظهر فيه اهتمامهن بحياتهن الشخصية وهواياتهن. نجمة اليوم هى يسرا حلمى بطلة منتخب تنس الطاولة فكان معها الحوار التالى.. ما هوايتك المفضلة بعيدا عن الرياضة؟ بحب القراءة وبعزف بيانو وبحب الرسم. ما الأكلة التى تتميزين فى طبخها؟ أنا فى المطبخ زيرو.. مش بعرف أعمل أى حاجة خالص بسبب الارتباط بالبطولات والتدريبات، ووقت الفراغ بمارس الهوايات اللى بحبها. من نجمك المفضل؟ كريستيانو رونالدو بحب أتفرج على ماتشاته وأتابعه من زمان جدا. من مطربك المفضل؟ مش عندى مطرب محدد بس مش بحب اسمع أى حاجة هادئة أو حزينة. لو لم تكونى لاعبة كنتى تتمنى تكونى أيه؟ مش متخيلة نفسى بعمل حاجة غير لاعبة رياضية، يعنى مثلا قبل الطاولة كنت بلعب جمباز، وكنت هكمل فيه، ولو هلعب حاجة غير الطاولة هتكون كرة القدم. لما تتعاكسى فى الشارع ممكن تستخدمى العنف؟ لا خالص مش بستخدم العنف ولا برد أصلا. مين من نجمات السينما كنتى تتمنى تكونى مثلها؟ بحب أمينة خليل جدا، جميلة ورقيقة. بتحبى الملابس الكاجوال ولا الفورمال؟ بحب الكاجوال لكن لو هحضر مناسبة هيبقى الفورمال طبعا. تفضلى الارتباط بشخص رياضى أم غير رياضى؟ رياضى لأنه هيكون فاهم ومقدر التمرين والتعب والتوتر كله اللى بيمر بيه أى لاعب أو لاعبة. لو طلب منك تسيبى الرياضة هتعملى ايه؟ مش من المفترض أنه يطلب منى أسيب الرياضة طالما أنا ناجحة وهو أكيد شايف كده من الأول.