يرى أحمد السيد، مدافع النادى الأهلى السابق، أن الفوز على منتخب ليبيا في المواجهتين المقبلتين في تصفيات أفريقيا المؤهلة لكأس العالم 2022، ضروري للاقتراب خطوة كبيرة من التأهل.
وقال أحمد السيد في تصريحات لبرنامج "البيت الكبير" الذى يذاع على قناة الأهلى: "لازم نكسب مباراة ليبيا هنا ونتعادل أو نكسب هناك، لكن مينفعش نخسر عشان منخسرش صدارة المجموعة".
وأضاف مدافع الأهلى السابق: "طول عمر ماتشاتنا مع ليبيا بتكون صعبة، أي مباراة بين بلدين بينهم حدود بتكون صعبة، زي ماتشاتنا مع السودان".
وأوضح أحمد السيد: "بعتبر محمد الشناوى هو نص فريق الأهلى حاليا، بقيادته وتوجيهاته لزمايله فى الملعب، لأن الكابتن دوره خارج الملعب 80% وداخل الملعب 20%، الدور كله فى التعامل مع اللاعبين نفسيا، الكابتن مش شارة".
وتابع: "أول ماتش أكون كابتن للأهلى فيه كان مباراة الأهلى وإنيمبا فى دورى أبطال إفريقيا 2005" متابا: "كنا بنعدى على محلات بتبيع لحمة رأس في أفريقيا بس لحمة رأس قرد".
وأضاف أحمد السيد: "كل حاجة اختلفت فى الكورة بعد الثورة، فرقتنا كانت كلها كباتن، لكن دلوقتى عشان تلاقى قائد فى الفرقة بيكون صعب شوية".
وعن لقب ميسى، قال: "كنا فى تمرينة تسديد على المرمى ولقيت نفسى بركن كل كورة فى الجول، أنا نفسى كنت مستغرب نفسي، فجوزيه شاف ده وقال خلاص أنت من النهاردة (ميسي) وفضل يقولى كدة على طول، ولما بيدرو سمع الناس بتقولى كدة، قولتله لأ ده اسم شهرة كدة لكن أنا أصلا مبعرفش أباصي".
وتابع: "مشكلة المدافع إنه لو كويس طول الماتش وغلط غلطة بيتهاجم، عكس المهاجم لو سيء طول الماتش وسجل هدف بيبقى نجم الماتش".
وعن مين من الجيل الحالى بيفكروه بجيلي، قال: محمد الشناوى بيفكرنى بالحضرى، ووليد سليمان وديانج والسولية ومحمد شريف، وستايل ميكيسوني نفس ستايل أفشة بس الـfootwork بتاعه أفضل".