أعرب إبراهيم حسن، مدير الكرة بنادى المصرى البورسعيدى، عن استيائه الشديد من التحكيم بشكل عام، وخاصة محمود عاشور، حكم لقاء المصرى والاتحاد السكندرى الذى جمعهما اليوم، وانتهى بتعادل الفريقين بنتيجة 1/1، مشيرًا إلى أن الفريق البورسعيدى يتعرض لمؤامرة وظلم تحكيمى بيّن.
وقال حسن، خلال تصريحاته لبرنامج "الكرة فى دريم" مع خالد الغندور: "أنا ذنبى إيه ألعب 90 دقيقة وأنا ناقص لاعب؟ وضربة جزاء وبدون وجه حق، ويوقف لى 3 أ و 4 لاعبين قبل ماتش الزمالك اللى جاى.. هو عيب إن نادى المصرى يبقى ربنا كارمه وماشى كويس بأقل التكاليف؟.. عارف لما تبقى ناس عايزة تعجزك بدون أى مبرر علشان أنت بتكافح وعندك ضمير، ولا بتنافق، ولا بترتشى، ولا بتسرق، ولا بتعمل زى الناس اللى بتعمل الكلام ده".
وأضاف مدير الكرة بنادى المصرى: "أنا شايف صورة قاتمة عن التحكيم، لما الحكم يبقى مصمم ومقتنع وواخد قرار إنه يعجز الفرقة دى طول الماتش، أنا تعبت جدًا، ولو هما عايزينا مانكملش والمصرى ينسحب يقولوا لنا علشان نخلص ونرتاح".