حرص المخرج بيتر ميمى على الرد على جميع الانتقادات التى وجهت لمسلسل "كلبش 2" الذى يعرض على قناة الحياة.
وكتب "بيتر ميمى"، بيانا عبر حسابه الشخصى على موقع التواصل الاجتماعى "فيس بوك"، "أنا عادة مش برد على تعليقات لكن بقرأها وباخدها باهتمام للتطور وفعلا الحمد لله وبفضله التطور موجود من عمل لآخر ومن سنة لأخرى، لكن حبيت أرد على بعض التعليقات لأن فعلا نسبة مشاهدة كلبش أصبحت فوق المتوقع لدرجة أكبر بكتير كمان من رمضان السابق".
وأضاف "ميمى": "عاكف أبو العز بيتحدث بلهجة صعيدية وأبوه بلهجة بدوية وده باين من أول حلقة (متبقاش صعيدى زى اللى خلفتك) وهنعرف مين اللى خلفته وليه مش أبوه اللى رباه فى الحلقة 15 ومعانا مصحح لهجة بدوى ومصحح لهجة صعيدى للدقة".
وتابع: "ضابط الأمن الوطنى ممكن يكون بدقن وشعر طويل عادى جدا وأنا راجعت ده بنفسى قبل التصوير من بعض الضباط و قيادات الداخلية وإحنا بناخد التصاريح للتصوير فى أماكن حقيقية وحية مثل سجن طرة ومستشفى الشرطة".
واستطرد: "وضعية مسك الآلى ممكن تكون من الماسورة وأثناء الاشتباك ممكن تكون من الخزنة لسرعة تغيير الخزنة وكان معانا عميد من العمليات الخاصة أثناء تصوير المشاهد ديه والراجل كان بيدى المحاضرة ديه قدامى للضباط مع العلم إن المدرعات والمركبات والجنود والضباط هم حقيقيين من العمليات الخاصة".
وأوضح بيتر ميمى فى البيان قائلا "تراك جيم أوف ثرونس اللى فى أول حلقة ده غلطة غير مقصودة لأن إحنا فى المونتاج بنحط تراكات عالمية وبعدين بنشيلها فى الميكساج ده بيحصل فى كل الشغل والحلقة الأولى كان فيها 13 تراك من جيم أوف ثرونس تم تغييرهم بموسيقى المسلسل ونسيو واحد سهوا، وبعتذر على الخطأ غير المقصود برده لأنى طلبت تغييرات فى الحلقة أكثر من مرة كل شوية بعدل فيها وإحنا عاملين موسيقى للمسلسل مصر كلها عارفاها من السنة اللى فاتت".
واختتم البيان قائلا: "ابن سليم الأنصارى بيرضع كراوية مع أنه المفروض بيرضع ريد بول عادى.. حلقة 8 أنا عدت المشهد لما روجينا قالت (عمر) بدل (حسام) سهوا والمونتير من ضيق الوقت حط الشوت الغلط سهوغ".
ووجه مخرج كلبش 2، الشكر لفريق العمل، قائلا: "أنا بشكر الناس اللى متابعة المسلسل بدقة شديدة وبشكر فريق العمل (النجوم - الإنتاج - المونتاج - التأليف - الميكساج - الموسيقى- الديكور - مساعدين الإخراج) علشان إحنا بسببكم بنافس على أعلى مشاهدة للسنة التانية على التوالى بجزء ثانى و ده مبيحصلش.
كلبش2 بما فيه من اكشن و ضخامة إنتاجية هيكون ولا حاجة بالنسبة للمشروع اللى تم تحديده للعام المقبل رمضان 2019 واللى هيكون الأضخم عربيا وبيضم مجموعة من نجوم عالميين من انتاج شركة سينيرجى إن شاء لله، ادعولنا بقى إحنا بنحاول نطور الصناعة وانتظرو حرب كرموز فى مصر والخليج وأوروبا (إيطاليا - المانيا- لندن)".
