برغم النجاح الكبير الذى حققته أغنية النفسية، للفنان محمد الشرنوبى، إلا أنها لم تخل من إثارة الجدل، بسبب طرح أغنية بنفس الاسم، وتحمل نفس المضمون، قبل طرح أغنية الشرنوبى، بيوم واحد.
الكاتب أيمن بهجت قمر، صاحب كلمات أغنية "الشرنوبى"، وضع حداً فاصلاً لهذا الجدل، وأكد أنه أخذ المسار القانونى، الذى يكفل له حفظ حقه فى كلمات وفكرة الأغنية.
وعلق قمر، قائلاً: "التعليق الوحيد والأخير اللى هقوله بخصوص أغنية النفسيه بإختصار، أنا الحمد لله مش محتاج بعد العمر ده إنى اتخانق مع حد وادخل فى نزاع على آخر الزمن على أغنيه ده شئ ما حصلش معايا فى بداياتى فأكيد يعنى مش المفروض إنه يحصل بعد ٢٧ سنه تعبت فيهم وبنيت اسم وسمعه الحمد لله مش هزكى نفسى".
وأضاف قائلاً: "أنا كتبت الأغنيه دى من حوالى ٣ سنين وعملناها أنا ومحمد يحيى لمحمد الشرنوبى من فتره طويلة سنه ونص وأكتر والكلام اترخص فى الرقابه باسمى فى أول السنه أول مارس وكل شئ كان تمام لحد ما لقيت من كام يوم مطرب شاب والله والله عمرى ما كلمته ولا أعرفه شخصيا ومش زى ما هو ماشى يقول، المهم لما لقيت الاسم والفكره والمحتوى كله متشابه من البرومو ولقيت لوجو صوت الدلتا، قلت بلاش أعمل بلبلة للولد مع الشركة، كلمت ملحن شاب صاحبه أنا أعرفه وبلغته إن فيه أغنيه لمحمد الشرنوبى، وكده حرام وخصوصا إن صاحبه قاللى فعلا إحنا عرفنا من وقت مهرجان الجونة إن فيه أغنيه معموله شبهها قلت له طيب الأغنيه دى بفكرتها متسجله باسمى فى المصنفات الفنية يبقى الحل نعمل زى الناس المحترمين يا تغيروا الكلام يا نلجأ لجهه تحكم بينى وبينهم وهى جهاز الرقابه على المصنفات الفنية".
وواصل: "الملحن بلغنى إنه مش عارف يحل ومش طرف فى الموضوع عكس اللى عرفته بعد كده طبعا ..المهم قلت له كده أنا هضطر أكلم حد فى صوت الدلتا وفعلا كلمت الأستاذ حماده اسماعيل والراجل مشكورا رفع البوستات والبروموهات لإن مش منطقي أسيب فكرتى مشاع وتتحرق ولما تنزل يقولوا إنى واخدها من حد تانى وعشان المطرب الشاب ما يتظلمش ويدفع تمن النزاع قلت لحماده إسماعيل وهو موجود يقدر يشهد على كلامى، برغم إنى مش ملزم بالمره إنى مستعد أهدى الولد أغنيه ومايحرقش الغنوه بتاعة الشرنوبى، وبلغت صديق المطرب الملحن الشاب وقاللى هبلغهم وفجأه جريوا سبقوا ونزلوا الأغنية قبلنا برضه بيوم والمطرب مشى يقول فى المواقع إنى كلمته وعرضت عليه أغنيه وهو رفض".
واستطرد: "حقيقى مهزلة وأسلوب رخيص ومافهوش أدنى أنواع الاحترام لفرق الخبرة والسن وللزمالة وشغالين كمان حسبى الله ونعم الوكيل وآيات قرآنية، ودعا علينا وكإن محمد الشرنوبى ده برضه مش مطرب في بداية حياته ومحتاج برضه الفرصة دى، والغريبة إنهم منزلين بوست بيسخروا منى فيه وبيتكلموا بمنتهى عدم الاحترام وبيبرروا إن جملة النفسيه محتاجه دى ملك الناس ومش حكر على حد طبعا ده كلام من واحد تافه معندوش أى فكره وجاهل طب ما الكلام كله ملك الناس، وأى حاجة بنكتبها الناس بتقولها ! وهو ده أساس نجاح الشاعر اللي بيلقط الكلمة أو اللحظه ويحولها لأغنيه ومادام اتسجلت باسمى بعنوانها و بفكرتها ومحتواها يبقى خلاص حتى لو توارد خواطر ما ينفعش غير لو هما معاهم ورق يحفظ حقهم بترخيص الكلام قبلى".
واختتم: "يعنى أنا أألف قصة وتنزل فيلم تيجى حضرتك تألف زيها وتقوللى ما أنا معرفش وتوارد خواطر والأفكار مش حكر على حد، كفايه استهزاء بحقوق الناس كفايه عدم احترام لتاريخ الناس كفاية كل ما تتزنق تحولها لصراع أجيال مع شخص هو هو نفسه اللى لحد أسبوع فات بتلجأله وقت ما بتحتاج لضهر ليك وكان أجدع واحد فى الدنيا وقت ما كانت جدعنته ماشيه مع مصلحتك، عموما بينا القانون مش عشان حاجة هاخدها من وراكوا مثلا لكن عشان زى ما كنت واحد من اللى علموكوا إزاى تدوروا على حقوقكوا هعلمكوا برضه إزاة ما تعتدوش على حقوق الناس ونفسى طويل ويمهل ولا يهمل".
يذكر أن أغنية النفسية، من غناء محمد الشرنوبى، وكلمات أيمن بهجت قمر، ألحان محمد يحيى، توزيع إلهامى دهيمة، وإنتاج إيرث برودكشن.
