دعا المطرب تامر حسنى، إلى استغلال وقت العزل المنزلى للوقاية من فيروس كورونا، في التخطيط لحياتنا بصورة أفضل، ومراجعة النفس في أي تقصير في الأحلام أو الطموحات الدارسة وضرورة أن نتفاءل لنكون أفضل فى الفترة المقبلة.
وقال المطرب تامر حسنى، عبر حسابه بموقع فيس بوك: "تيجوا نحاول نستغل وقتنا أحسن من كدا ..في ظِل رغْبتنا في التَخلّص من الوباء..أنا شايف إنها فُرصه كمان نتخلص من أي وباء فِكري بيطاردنا في أي شيء في حياتنا خطط أحسن لحياتك لنجاحك تخطيط تفخر بيه وتفرح بيه أهلك و تكون فخور قدام ولادك اللي لسه مجوش أو لو موجودين تخليهم فخورين بيك أكتر عندنا وقت كبير".
وأضاف: "وطبعاً محدش يفكر بطريقة ياترى أنا هعيا إمتى مش هيصيبنا إلا اللي ربنا كاتبه المهم نكون واخدين حذرنا صح و عاملين اللي علينا فنخلي عندنا شوية تفاؤل و ثقه في كّرم ربنا".
وأكمل: "فكر إيه اللي مخليك مش عارف تطلع قدام راجع نفسك في كل تقصير و أهم تقصير اللي بينك و بين رَّبنا و تقصيرك في طُموحاتك و أحلامك و دراستك وبينك و بين أهلك ومراتك و أولادك أو تقصير في شُغلك أو صحتك..قوم أكتب لو حتى هدف واحد هتحققه الفترة دي قول أو قولي أنا قررت أخس أو أتمرن في البيت شويه أنا قررت أقوي لغتي التانيه قول أنا قررت أتخلص من أصحاب السوء و قررت أعمل أصحاب جديده عندهم طموحات.. قررت أبطل تدخين أو قررت تبطل مخدرات أو تقول أنا قررت أغير عيوب فيا المُهم إنك تشوفها و تعترف بيها لأن دي أول مرحله في علاج نفسك إنك تعترف بعيوبك و ربنا يقدرنا جميعاً و نستغل وقتنا صح".
وأستطرد قائلاً: "ومتحسسش نفسك إن حياتك كلها أتلغت فتوقف حياتك تماماً كدا غلط لإن ربنا لو كان عايز يوقفلنا الحياه تماماً كان هو وقفها متحملش نفسك أكتر من طاقتها إن شاء الله ربنا فرجه قريب".
يشار إلى أن النجم تامر حسنى كان قد طرح ابتهالًا جديدًا لرفع البلاء، من كلمات وألحان تامر حسنى، رؤية موسيقية عبد الرحمن شوقى، وذلك بعد انتشار السريع لفيروس كورونا الذى يعانى منه العالم أجمع، وتقول كلمات الابتهال: "انشغلنا بالرزق عن الرزاق، وانشغلنا بالنعم عن المنعم، ولا بنحس بالنعمة إلا لما تروح من إيدينا، يارب ارحم ضعفنا وضمة عيالنا فى حضننا، وبحق قوة كن فيكون ترفع غضبك عننا".
