جمال يوسف باكياً فى رسالة صوتيه بعد شفائه من السرطان: "ربنا ادانى فرصة"

أعرب الفنان جمال يوسف عن سعادته الشديدة بعد تلقيه خبر شفائه من مرض سرطان البلعوم الذى أصيب به من 5 أشهر، حيث قال فى تسجيل خاص لـ"انفراد":"الحمد الله يارب ألف حمد وشكر ليك يارب ربنا كبير أنا لسه واخد النتيجة بتاعت المسح الذرى الورم راح والله شوفت حب الناس وشوفت الناس الطيبة وهما بيدعولى بلدنا حلوة وأهلها ناس طيبين". وأضاف جمال يوسف :"ناس معرفهاش كانت بتدعيلى بشكر كل الناس اللى فى مقام أمى وأبويا وأهلى وأخواتى، لما الواحد كان يحس انه رايح فى حته وربنا يمد ايده ويقوله تعالى أنا هديك فرصة درس للإنسان انا كلمت دكتور تامر نحاس ربنا يبارك والدكتورهشام عباس وأشكر الدكتور مجدى الشربينى اللى وقفت معايا خطوة بخطوة وبتبعنى لحد دلوقتى الورم مشى بس أنا هفضل تعبان شهر شهرين لحد ما اتعافى من اثر الكيماوى". كما وجه الشكر لكل زملائه اللذين وقفوا بجانبه في أزمة مرضة، قائلا:" بشكر كل زملائى و أول ما دخلت البيت لقيت مكالمة من أستاذ صبحى الله على جمال الراجل أبويا و أستاذى ده قالى مش هتقوم بقى و نشتغل ولا هتستموت فيها ربنا يخليك و نعمة الاب أنا بحبة حب غير عادى أستاذ و تاريخ ويسأل عليا و مهتم بيا فى كل أشغاله علمت أجيال و اتعلمنا على ايديك و عرفنا يعنى ايه مسرح على ايديك. وتابع يوسف: "المخرج أحمد مدحت ابن الراحل مدحت مرسى عاملت معايا كتير أوى وزملائى عمرو عبد الجليل وخالد عبد السلام وشريف عواد وياسر عزت ووفاء عامر ونشوى مصطفى وحنان سليمان وهشام الحصرى وهشام شريف وكل صحاب الجامعة وأهلى فى حلوان اللى يعرفنى وميعرفنيش داخل الاشاعه لقيت ست كبيرة معرفهاش بتدعيلى الناس تمشى تسلم عليا فى المعادى وتقولى بندعيلك قد ايه المصريين الطيبين ربنا كبير بشكر اختى المخرجة إيمان شعبان و سعاد الهجان و نهلة فاروق و أمل أسعد و قفتوا جنبى و مش عاوز انسى اسم". واختتم حديثه، قائلا:" اللى زعلان من حد يسامح الدنيا مش مستهلة انا حلوان ناس بتدعيلى معرفهاش و جروبات فى الجامعة عند بنتى بتدعيلى و ناس فى السعودية بتكلمنى تدعيلى ربنا كبير أوى بس هو عاوزنا نقول يارب احنا عبيدك وانت رب الكون يعنى كنت من اسبوعين كنت عامل ازاى و دلوقتى بقيت عامل ازاى بفضل دعاء الناس متشكر لكل الناس اللى دعيتلى". وكان الفنان جمال يوسف قد كشف لـ"انفراد" أنه اكتشف المرض فى شهر أبريل الماضى وقال "بدأت أشعر بآلام فى الغدة الليمفاوية والدكتور قال لى أعمل عينة وذلك فى شهر 4، وخرجت نتجية العينة فى شهر 5 واكتشفت اصابتى بورم فى الغدد اللمفاوية البلعوم الأنفى". وأضاف يوسف: "اتجهت للنقابة، وربنا يجازيه خير ويباركله الدكتور أشرف زكى، دا مش بنى دا ملاك، وقف جنبى وبعتلى دكتور أورام قالى لازم ناخد جلسات كيماوى ونعمل 35 جلسة إشعاع، وبعد ما اخدتهم أثروا على البلع والأحبال الصوتيه علشان كدا صوتى مش واضح أوى".