قال الفنان محمد عبد الرحمن أحد نجوم "مسرح مصر"، عن تعاونه مع الزعيم عادل إمام في مسلسل "أستاذ ورئيس قسم"، إنه كان يعانى من رهبة شديدة للوقوف أمامه، معلقا: "الرهبة دى عند أي ممثل في الوطن العربى، إنه يقف يعمل حتى ثانيتن مع الزعيم عادل إمام، خاصة إن في المسلسل أنا طالع بدور صاحب الزعيم، اللى هو سواق التاكسى اللى بيلف معاه، أستاذ عادل إمام مبهر، وفعلا زعيم للفن وللثقافة.
وأضاف عبد الرحمن الشهير بتوتا عبر برنامج "شو تايم"، والذى تقدمه المذيعة مها الصغير على قناة CBC: "مواعيدنا مثلا بنحضر قبل الكاميرا بساعة، أستاذ عادل إمام بيتواجد قبلها بساعتين، وكان الحمد لله بيحبنى ويسأل عليا على طول، وأنا كنت باجى بدرى قبل الحضور بشوية، لكن أستاذ عادل إمام أبهرنى على جميع المستويات من حب الشغلانة والتركي، وإن ما نهزرش وإحنا بنشتغل وده أتعلمته من أستاذ عادل إمام جدا، وإن ما أستهترش بأى حاجة في الشغل، عشان ده اللى هيخلينى بعد كدة كبير".
وعن كواليس الزعيم عادل إمام في التصوير: "دايما بره التصوير، ماسك الورق ومركز فيه أوى، يطلع من المشهد يشوف المشهد اللى بعده، لو هنعمل بروفة مع بعض مثلا، لو هيسأل المخرج في حاجة، فالموضوع بيكون لذيذ جدا مع الزعيم".
وعن نصائح الزعيم له، قال: "نصايحه لى أول ماجبت عربية فقالى بتعرف تسوق، قولته خبطت الفانوس، قالى ياابنى خبطت الفانوس أنت شاريها من أمتى؟، قولتله من 3 أيام، حتى عملت حادثة بعد كدة جامدة، وعندما عرف الزعيم عنفنى، وقالى ما تسوقش عربيات تانى، مش هنجيبلك عربيات تانى، فهو أستاذ عادل إمام بيحب كل الناس اللى معاه كدة، فالناس اللى معاه بتشتغل بأريحية".