"سميرتى وأميرتى..أنا عارف انك مغصوبة عليا، خلقتى مش ولا بد، راس كبيرة وجتتة عيل، لكن اللى عاوز أقولهولك انى عمرى ماهغصبك على حاجة، انتى جوهرة غالية اتمنتها والمولى قسم لى بيها وهيقدرنى أسعدها وأحافظ عليها، البيت ده بيتك وأنا فيه ضيف وأوعدك عمرى ماهبقى ضيف تقيل"..ده الكلام اللى قاله حسين أبو الروس لعروسته سميرة فى مسلسل حديث الصباح والمساء واللى كان من أكتر المشاهد تداولا على مواقع التواصل الاجتماعى..مشاهد قليلة فى المسلسل أداها الفنان مجدى عبيد لكنه قدر من خلالها يخلى الناس كلها تفتكره وتتعلق بيه.. وبعد سنين استنى فيها فرصة تانية أصيب بأكتر من جلطة وبيرقد مريض فى المستشفى..خلونى أحكيلكم أصل الحكاية
الفنان مجدى عبيد كان نجم فى دوره رغم مساحته القليلة لأن الإبداع والشطارة إن الفنان يثبت موهبته ويلفت انتباه الجمهور حتى لو دوره بسيط ومشاهده قليلة، ورغم نجاحه الكبير فى مسلسل حديث الصباح والمساء واللى كان متوقع بعده إنه يلاقى أدوار أكبر ماظهرش الفنان الموهوب غير فى أدوار صغيرة فى عدد من المسلسلات والافلام ومنها افراح القبة وابو العروسة 2 وبدون ذكر اسماء ، وفيلم الكنز ومولانا لكن مكانتش الأدوار دى بحجم وتأثير شخصية ابو الروس اللى اشتهر بيها لدرجة ان كتير ميعرفوش اسمه الحقيقى.
وفى حوار أجريناه مع الفنان مجدى عبيد قال انه رحلته مع الفن امتدت لأكثر من من ربع قرن بدأها كمخرج وممثل فى مسارح الثقافة الجماهيرية سنة 1986 وقدم خلالها عدد كبير من المسرحيات ومنها جحا وبقرة السلطان، وقوم يا مصري وشباك مكسور وغيرها
وحكى عن ترشيحه لدور أبو الروس وقال إن اللى رشحه للدور السيناريست محسن زايد بعد ما شافه فى عرض مسرحى وكان يعرفه قبلها، واداله الرواية الأصلية لنجيب محفوظ اللى اتاخد منها المسلسل علشان يقراها وقاله إنه بيشوفه بينط من الورق كل ما يكتب مشاهد شخصية ابو الروس، وقال مجدى عبيد إنه عمل كل جهده علشان يأنسن الشخصية ويقدمها بشكل أعمق من مجرد السخرية زى أغلب الأعمال الفنية اللى دايما تتريق على العيوب الخلقية أو بتاخد الأقزام وقصار القامة والمختلفين فى الشكل والحجم كمادة للضحك، وأضاف من عنده بعض اللزمات للشخصية زى حركة الراس وكلمة ياصاحبى اللى كان دايما بيستخدمها.
وقال إن أجره فى المسلسل كان 6 آلاف جنيه و إنه كان مستعد يقبل الدور ولو بدون مقابل لأنه حب شخصية أبو الروس.
ولما سألناه انت فين بعد السنين الطويلة دى ، ضحك بحزن وقال أنا موجود وسؤال انت فين بيوجعنى ادونى ميعاد وأنا أجى.
وبمرارة قال ماعنديش رفاهية إنى أرفض أى عمل فنى، وأحيانا باقبل عمل ب 3 تعريفة وفى الآخر مااخدهمش، وأكد إنه ساعات يشتغل دراما أو سينما علشان محتاج فلوس يتحرك بيها وهو بيشتغل فى المسرح، وإنه بيحلم يجسد دور أحدب نوتردام.
مجدى عبيد كان دايما يهزر ويسخر من أحزانه وينهى كل كلامه بعبارة مجراش حاجة يعنى، وكل يوم على صفحته كان يكتب أسماء زملائه الموهوبين اللى رحلوا ويفكر الناس بيهم..والنهردة بيرقد فى المستشفى بعد إصابته بجلطة ، علشان كدة خصصنا حكايتنا علشان ندعيله هو وكل الموهوبين المظلومين ونقوله قوم يافنان وكمل مجراش حاجة يعنى.