تحدث النجم هانى شاكر عن كواليس علاقته بالعندليب عبد الحليم حافظ، قائلا: "أول ماطلعت اتقال شائعات كتير إن فى منافسة بينى وبين عبد الحليم، أنا ماكنش ليا علاقة بالموضع ده أكيد مافيش منافسة ولما قابلته قولته أنا عمرى ما أقول الكلام ده استحالة أفكر أحارب قيمة كبيرة زيك أنا مين أصلا.. عبد الحليم وصوته قيمة كبيرة فاستحالة يتقال إنى طالع عشان أحاول العندليب".
وعن لوك هانى شاكر فى بداية ظهوره قال شاكر ساخرا: "كنت بسوالف وخدود، السوالف راحت والخدود لسه موجودة.. على فكرة اللوك ده كان موضة وبنطلون الشارلستون والجزمة الكعب كنا بنفصل اللبس ده".
كما تحدث هانى عن حبه لنادى الزمالك قائلا: "أنا بحب الزمالك، أخويا الكبير شربنى حب النادى من وأنا صغير، كان يشلنى على كتفه وغنى يا زمالك يا مدرسة لعب وفن وهندسة"، وأشار شاكر إلى أن أفضل جون فى 2020 جون شيكا، وعن ترشح مدحت العدل لرئاسة نادى الزمالك قال هانى: "أنا بثق فى مدحت وعائلة العدل أصدقائى وأكيد هدعمه".
كما كشف المطرب هانى شاكر أنه كان يحاول التركيز على الأغانى الدرامية، والتى كان لها دور كبير فى صناعة نجوميته، بعدما شعر أن الجمهور يطالبه بهذا النوع من الأغانى، وذلك فى تصريحات له خلال برنامج " كلمة أخيرة" مع الإعلامية لميس الحديدى على قناةOn .
وعن التباعد والعزل المنزلى بعد انتشار فيروس كورونا، قال: "الواحد عرف معنى نعمة الخروج والسفر بعد انتشار فيروس الكورونا والله السفر وحشني".
وأضاف هانى أنه أقام حفلين خلال فترة الفيروس واحدةonlineوالأخرى بمهرجان الموسيقى العربية، قائلا: "بس حفلات الـonlineصعبة أوى ربنا يكون فى عون فرق الكرة لما بتلعب من غير جمهور صعب أفضل بغنى وانا باصص فى كاميرا مش حاسس بتفاعل الجمهور".
وعن لقاح فيروس كورونا قال شاكر: "أنا حابب استنى شوية قبل ما اخد اللقاح، الصراحة مجهودات وزارة الصحة غير مسبوقة فى الأزمة دى".
كما اعتبر هانى شاكر الأطباء والممرضين خط المواجهة مشيرا أنهم يعتبرون أبطال 2020، وعن أفضل الأغانى التى سمعها خلال العام قال " أغنيتين لعمرو دياب يوم تلات وقدام مرايتها، وعمرو من انجح المطربين، وعجبتنى كمان أغنية لقيت الطبطبة لحسين الجسمي".
وعن الغناء فى العالم العربى خلال ٢٠٢٠ قال شاكر: "2020 ماكنتش من السنوات اللى فيها عطاء فنى نتيجة الظروف اللى مرينا بها دا غير الصراع بين الناس اللى بتنادى بالقيمة والناس اللى فاكرة الفن دا لقمة عيش".
وأضاف: "أنا بشوف المهرجانات أقل من الغنى الشعبى عشان كدا قلت لعمر وشاكوش وغيرهم خلى فى بالكم دايما الناس هل يصح نقول خمور وحشيش فى أغنية.. المشكلة دلوقتى فى السوشيال ميديا اللى نشرت كل حاجة بشكل مش طبيعي... المشاهدات بقت تتحكم فى كل حاجة.. مافيش مشكلة نسمع مهرجان لكن على الأقل يبقى فى اهتمام بكل نوعية.. ممكن نقدم اى حاجة خفيفة ونفس رتم أغانى المهرجانات بس نختار الكلام شوية".
وعن أغنية "يا بخته" قال هانى شاكر: "الأغنية عجبتنى أوى أول ما أحمد بعتهالى، رغم أن أحمد سعد كان مغنيها لوحده بس قولتله تعالى نجرب رغم انى كنت خايف من الخطوة لان الأغنية جديدة عليا.. عشان كدا كنت بحاول أقلد احمد سعد عشان اعرف اغنى شعبى زيه".
وأضاف: "انا اتفاجئت من نجاح الأغنية والمشاهدات، وحسيت إنى عملت حاجة كنت بتمناها"، مضيفا: "الأغانى الشعبى مش أقل من الغنى العادى احنا اتربينا على الغنى الشعبي".