كارول سماحة: قلت لـ بتول عرفة "انتى شاربة حاجة" لما عرضت فكرة كليب شكرًا

أعربت النجمة كارول سماحة عن سعادتها على الاستقبال الرائع لها داخل مؤسسة انفراد، قائلة: "شكرًا على الاستقبال الأكثر من رائع، خاصة من الأستاذ خالد صلاح وهو صديق العائلة". وقالت كارول سماحة، خلال ندوة تكريمها في لقاء لتليفزيون "انفراد"، مع الكاتب الصحفي عمرو صحصاح رئيس قسم الفن: "أنا من الأشخاص الكتير بدقق فى شغلى، وبقف على التفاصيل، وفى نفس الوقت مغامرة، وبحب كل الجديد، واللى حصل أن شركة لايف ستايلز كانت بتعمل أغنيتى "شكرًا"، اللى واخدة حقوقها من سنتين، والأستاذ هانى شاكر كان عنده أغنيته "بقالى كتير"، والمخرجة بتول عرفة وده تانى عمل معاها بعد أغنية bonvouage، وقولت ليها إحنا هنعمل حاجة مختلفة سوا وسمعت الأغنية واتصلت بيا وقلتلى جت فكرة مجنونة إيه رأيك ندمج العملين مع بعض انتى وهانى شاكر هو موديل في أغنيتك وانتى موديل في أغنيته، أنا صمت وقلتلها انتى شاربة أو أكلة حاجة قالتلى شاربة عصير برتقال فريش". وأضافت كارول: "الفكرة خارج الصندوق وحلوة أوى وبتول صديقتى من 2007 وأنا من اليوم ده عارفة أنها مخرجة شاطرة جدًا، وقولت ليها الفكرة عبقرية، ومنكتش حاسة أن أستاذ هانى ممكن يرفض الفكرة أنا عارفاه هو فنان حقيقى خاصة أن العمل قوى، بتول مكملتش المكالمة معاه وقالها طبعا موافق أكيد دى كارول حبيبتى وأتشرف أنى أشتغل معاها، والكليب عامل ضجة في العالم العربى".