أعرب الموسيقار راجح داوود، عن سعادته بفوزه بجائزة الدولة التقديرية فى مجال الفنون، مؤكدا أنه لم يتوقع الحصول على الجائزة، وقال راجح داوود، خلال برنامج "كلمة أخيرة"، المذاع على قناة on، والذى تقدمه الإعلامية لميس الحديدى: "انبسطت بالجائزة جدا وأنا طول الوقت بتعلم، وفي لحظة لو حسيت أنى مكتفى يبقى انتهيت كفنان، وكل ما آجى أشوف حاجة عملتها من 5 سنين أقول عملتها ليه كده كان ممكن أعملها أحسن.
وأضاف راجح داوود: "بدأت كعازف بيانو في المدرسة وكان عندى 14 سنة، وأول حاجة لحنتها كانت أغنية للأطفال وسمعتها لصلاح جاهين وروحت له البيت كان قاعد وسط ورق بيرسم سمعها، وقالى نصيحة أنى أسمع حاجات كتير وبعد كده أألف أغانى".
وتابع: "أول فيلم عملته كان الصعاليك مع المخرج داوود عبد السيد وعملت معاه كمان ثانى وثالث افلامى، وداوود عبد السيد ابن عمى واختياره ليا ملهوش علاقة بأن احنا قرايب وجربنى في الصعاليك ونجحت في الامتحان وكملت معاه والموسيقى في الفيلم هي الروح وفيلم بدون موسيقى جسد بلا روح والوسيقى مش مشاعر فقط بيبقى فيها فكر".
واستكمل راجح حديثه: "أن ممكن يغير موسيقى بعد طلب المخرج لو عنده منطق اغيرها لو معندوش لا أنا مش بعمل الموسيقى للمخرج ولا لنفسى دى للفيلم، وموسيقى فيلم كيت كات اتعرضت للانتقاد يعنى مشهد محمود عبد العزيز وهو سائق الموتوسكيل وأعمى، المشهد يبان كوميدى لكن الموسيقى مليئة بالشجن، وعبرت عن البُعد ده ومينفعش تبقى كوميدية، وفي وقتها ناقد طلع انتقدنى وانتقد الموسيقى، وبعد 5 سنوات كلمنى في التليفون وقالى أنا فهمت موسيقى فيلم كيت كات".