ميمى جمال .. كيف عاشت الجميلة بعد وفاة حضرة الناظر حسن مصطفى " فيديو"

جمعت الفنانة الجميلة المحبوبة ميمى جمال والفنان الراحل الكبير ذو الشعبية الواسعة حسن مصطفى رحلة حب وفن وزواج كانت نموذجا للعشرة الطيبة والوفاء والود، واستمرت حتى وفاة الفنان الكبير حضرة الناظر حسن مصطفى ، وبعده تعيش الفنانة الجميلة على ذكرياتها معه. وفى حوار لأول مرة من داخل البيت الذى شهد قصة حب وزواج وحياة الثنائى الجميل " الجميلة وحضر الناظر تحدثت الفنانة الكبيرة ميمى جمال لـ "انفراد" عن تفاصيل حياتها فترة مرض زوجها الحبيب وكيف تعيش بعد وفاته. وتحدثت عن قرارها بالابتعاد بعد مرض ووفاة زوجها الفنان الكبير حسن مصطفى قائلة: «لما جوزى مرض وتوفى حسيت فى لحظة إنى تُهت، كأنى قاعدة على كرسى ومرتاحة وفجأة حد شد ضهر الكرسى فبقيت فى الهوا». يرتجف صوتها وهى تتحدث عن شريك حياتها وحب عمرها: «هو الراجل الوحيد فى حياتى، متجوزين من سنة 66، كان ليا الأخ والأب والزوج والحبيب والسند، وشايل عنى مسؤولية كل حاجة، وعارف عنى كل حاجة، كنا نبص لبعض كل واحد يفهم التانى عاوز يقول إيه، عشرة طويلة، وفجأة راح، ولما مالقتهوش تعبت نفسيا وحسيت بزلزال هزنى وماقدرتش أشتغل». تتحدث عن التغير الذى أصابها بعد وفاة زوجها الفنان حسن مصطفى قائلة: «بعد وفاة حسن بفترة، بعت لى الأستاذ أحمد الإبيارى مسرحية وقال لى اخرجى من أحزانك واشتغلى، المسرحية كانت كوميدية ولما حضرت البروفة لقيت جوايا حزن، ومافيش ضحك ماقدرتش أطلع الضحكة، وحسيت إنى مش هقدر أخدم البطل اللى معايا وأسنده زى ما سمير غانم الله يرحمه كان دايما يقول، ميمى دى العمود اللى واقف قدامى». وبحزن وانكسار قالت: « حسيت إنى مش قادرة أسند حد، وإنى تعبانة ومش لاقية السند اللى كان بيقوينى فرجعت العربون واعتذرت، وبعد فترة اتعرض عليا فيلم «لف ودوران» مع أحمد حلمى، ولقيته فيلم خفيف ودورى أم، ومش كوميدى أوى، والفيلم فيه سفر فقلت أحاول أخرج من أحزانى، وبعد الفيلم الدنيا قفلت معايا، وقعدت 5 سنين ما اشتغلتش، حسيت إن تعب السنين حل عليا، وإنى ما ادتش ولادى وحفادى حقهم، لأنى كنت طول الوقت بشتغل، ووالدتى هى اللى اهتمت بولادى، فقلت كفاية أعيش مع ولادى وأحفادى الشوية اللى فاضلين». وبحكمة قالت: «الحياة عاملة زى قطار بنركبه وفى الآخر هننزل كل واحد فى محطته، ليه ننزل تعبانين، فقلت عاوزة أكمل حياتى مستريحة». وبحنين من قضى أجمل سنوات عمره فى الفن، أجابت حين سألناها عن حب الجمهور لها ورغبته أن يراها، خاصة أن بنتيها كبرتا وتزوجتا، وقلت مسؤولياتها: «أنا لما قعدت قدام الكاميرا ونورت قدامى، حسيت بالحنين، وقلت هو ده مكانى وحياتى اللى متعودة عليها، ومن حوالى أسبوع بعت لى المخرج محمد النقلى وعرض عليا مسلسل، فقلت لو قبل رمضان اتعرض عليا حاجة حلوة ممكن أفكر». وبالفعل اعلنت الفنانة الكبيرةة ميمى جمال خلال الساعات القليلة الماضية عن عودتها للفن والأضواء من جديد من خلال مسلسل"أخر دور"