اتهم المطرب الشاب محمود المنسى، الفنان أكرم حسنى بسرقة لحن أغنية "للّى" للنجم محمد منير، من كلمات وألحان أكرم حسنى. والتى طرحها الكينج منذ يومين وحققت نجاحا كبيرا بين عشاقه.
وقال المطرب الشاب فى فيديو مصور: "إن أول أغنية من إنتاجى كانت بعنوان ولد الهلالية.. بصراحة أنا مضايق جدا من بعد ما نزلت أغنية محمد منير (للّى) واتفاجئت إن اللحن بتاعها (كوبى بست) من أغنيتى.. أنا مش طالع أتهم حد بعينه ولا محتاج تبريرات زى توارد الأفكار أو توارد الألحان.. لأن الفنان محمد منير فنان كبير وله تاريخ مشرف وأنا من عشاقه.. وأكرم حسنى فنان مبدع.. لكن بعيدا عن آرائنا الشخصية أنا متمسك بحقى الأدبى جدا".
وليس هذا الاتهام الأول للفنان أكرم حسنى، إذ اتهمه الشاعر عادل صابر، أمس الخميس، بسرقة كلمات أغنية "للّى" للكينح محمد منير، وقرر اتخاذ الإجراءات القانونية ضد أكرم حسنى واللجوء للقضاء.
وأعلن الشاعر عادل صابر أن القضية ستطرح قريبا أمام القضاء للحسم فى الموضوع وقد تولى القضية مكتب المحامى أدهم العبودى، دون تجريح أو هجوم على أحد، بحسب قوله.
من جانبنا، تواصل "انفراد" مع الفنان أكرم حسنى للرد على تلك الاتهامات، لكنه رفض التعليق واكتفى بالقول: "الكلمات أمام الناس.. ولهم الحكم والتعليق".
يذكر أن مذهب الأغنية التى كتبها الفنان أكرم حسنى يقول:
سألته هل داء الولع كان الجواب صدّه
ساق الدلال ساق الدلع مفاتيح هواه صدّوا
ومشيت أوشوش في الودع ولا جاني ليه ردّه
اللي فتح باب الوجع واجب عليه ردّه
...
أما الموال الرباعي للشاعر عادل صابر يقول:
صَنـــْف الطــحــــين يتعــــرف ويبـــــان مــن ردُّه
وان كــــان ســــؤالك قبـيــح حــيـبـــان مـــن ردُّه
كُـــــل البــــلايــــا لابــــُد يكــــون لهـــا أسبــاب
واللى فـــتَح بــاب خراب... واجــب عليـــه ردُّه
ثم جاء رد أكرم حسنى على صفحته على "فيس بوك" قائلا: قريت من شوية بوست بيتهمنى بسرقة كلمات أغنية (للى) من شاعر من جنوب مصر الحبيب وبعدها أكتر من صحفى كلمنى بيطلب منى رد على الاتهام ده.. فخلونى أوضح كذا نقطة :
1 - كل الحب والاحترام والتقدير لكل موهبة فنية بتقدم فن يحترم الجمهور وجنوب مصر خرجلنا شعراء وأدباء كتير على رأسهم الخال الأبنودى رحمة الله عليه.
2 - أؤمن بحقوق الملكية الفكرية كما أؤمن بأن السرقة الفنية تصنع نجاحا مؤقتا.
3 - تشابه جملة من الأغنية التى تتكون من 12 بيت مع جملة للشاعر لا يعنى السرقة وإنما توارد الأفكار أمر طبيعى.
4 - لما كتبت الأغنية كانت مكونة من 20 بيت اختار منهم الكينج 12 بيت وتم تسجيلهم فمعتقدتش اللى كتب 20 بيت هتقف معاه فى جملة عشان يسرقها.
5 - أنا بكتب أغانى بقالى أكتر من 8 سنين من خلال برامج ومسلسلات وأعمال فنية قدمتها وكنت على سبيل المثال فى أغانى برنامج أبو حفيظة قبل ما بستخدم لحن أى أغنية فى البرنامج برجع لجمعية المؤلفين والملحنين وأسدد الرسوم حفاظا لأصحاب حقوق الملكية الفكرية.. ف اللى يعمل كدة بيتهيألى صعب يحط نفسه فى موقف زى ده.
6- أنا مهنتى الأساسية ممثل وبحب صناعة الأغانى من باب الهواية ف أنا مش محتاج أسرق عشان أعمل رصيد لنفسى كشاعر.. أنا بعمل ده بحب.
7 - وأخيرا.. أنا كتبت البوست ده مش دفاعا عن نفسى ولكن لاحترامى للجمهور المحترم اللى بيثق فيا ف حبيت أوضح له.