حنان مطاوع لـ"صاحبة السعادة": والدى وصى بدخولى معهد الفنون المسرحية

استرجعت الفنانة حنان مطاوع ذكريات بدايتها في التمثيل، ومشاركتها في مسلسل "حديث الصباح والمساء"، قائلة أثناء استضافتها ببرنامج "صاحبة السعادة": "المخرج محسن زايد كان عايز وجوه جديدة كتير، ولما شافني في الأفلام القصيرة اللى بدأت أعملها بعد ما روحت ورشة تمثيل قال البنت دي وشها مصري أوي وها تنفع في دور (مطرية). وأضافت الفنانة حنان مطاوع بخصوص رد فعلها والدتها آنذاك خاصة أن والدها كان توفى: "كانت تشجعني على استحياء، في تلك الفترة، إلى أن أصبحت بعدها تشجعني بقوة وأبرز مشجعة ليا، وكانت طول الوقت باين عليها إنها عايزة تحقق حلمها فيا". وبخصوص الأيام الأخيرة في حياة والدها الفنان الراحل الكبير كرم مطاوع قالت: "أثناء زيارة المخرج جلال الشرقاوي له وهو على سرير المرض، قال ليه البنت دي بتاعة فن، شيلوها من تجارة إنجليش ودخلوها معهد الفنون المسرحية". كما كشفت الفنانةحنان مطاوععن أسباب عملها أثناء دراستها الجامعية فى وظيفة الترجمة كمرشدة سياحية، وقالت: "كنت بتكسف آخد من ماما مصروف، رغم اننا ما كناش محتاجين، فبالتالى حبيت أساعد ماما، رغم إنها مش محتاجة مني ده، لكن كنت بتكسف أقولها هاتي فلوس، وبالتالى حبيت خلال فترة الدراسة أترجم بالقطعة، وبقيت مترجمة، وباخد فلوس في المقابل". وردا على الشائعات التي طالت العائلة وقتها أن المعاش لم يكن يكفيهم وأمور من هذا القبيل قالت حنان مطاوع: "الحمد لله إن الوقت ده ما كانش فيه السوشيال ميديا كنت هأتبهدل".