تعرضت فريدة ابنة الفنانة مى كساب والتى لم تتجاوز الثلاثة أشهر بكسر فى عظمة الترقوة بعد أن وقعت من أعلى الكرسى، وهذا ما أصاب مى بحالة نفسية سيئة ليلة أمس.
وعبرت عن شعورها بالندم بعد تسببها بشكل غير مباشر لإصابة ابنتها الصغيرة، مؤكدة أنها عاشت أمس أسوأ أيام حياتها.
وكتبت مى عبر حسابها على موقع تبادل الصور "إنستجرام": "ما كنتش عاوزه أكتب أى حاجة ولا أتكلم بس اتعودت إنكم جزء منى بافرغ اللى جوايا معاكم وبافرح بكلامكم الحلو اللى بيدينى كل الطاقه الإيجابية اللى بتخلينى قادره اكمل فى الحياه امبارح كان يوم وحش قوووى اصعب من يوم وفاة أمى".
وتابعت: أول مره هاقول الكلام ده فى حياتى لما أمى ماتت فضلت تعبانه نفسيا جدا وحاسة إن أنا السبب أنا اللى أخدتها واديتها الإشعاع وفضلت عايشه كتير بالإحساس ده بس الحمد لله ربنا كان حاضنى جدا وادانى إشارات كتير قوى تبرد قلبى وانا الحمد لله جريت ع الكعبه عشان أبرد قلبى وعملت عمره لامى وهديت خالص وقلت انا لله وانا اليه راجعون ده عمرها وانتهى لحد هنا".
وأضافت: "إمبارح كنت شايله فريدة مشيت بيها بالظبط متر من الريسيبشن للجنينة كنت عاوزه أقعدها فى الشمس راحت أيد الكرسى مفكوكة ووقعت ع الارض عشت اسود يوم فى حياتى كنت حاسه كأنى مجرمه مذنبه قلبى مش قادره أوصف عامل ازاى عينيه ما بتنشفش من الدموع عندها كسر فى عضمة الترقوة".
واختتمت كلامها: "دى هتستحمل إزاى هانام ازاى الليل هيعدى علينا ازاى بس ألف حمد وشكر لله عدى الليل وربنا رحمته واسعة الحمد لله قل لن يصيبنا إلا ما كتب الله لنا ربنا يحفظ اولادنا الضنا غالى قوى الله يرحمك يا امى ربنا يقوى كل الأمهات والأبهات على تربيه ولادهم والحفاظ عليهم ربنا يقدرنى ويحفظلى بنتى ويخفف عنها الالم بصتلى بصه امبارح بالدنيا كلها كأنها بتتكلم وبتقول لا يا ماما ما تعيطيش انا هابقى كويسه ربنا يحفظك يا نور عين ماما ربنا يرزق كل مشتاق".
