كشفت دالى حسن بطلة كليب "ركبنى المرجيحة" كواليس تصوير الأغنية لـ"فيديو 7" قناة "انفراد" المصورة، وقالت: "أنا كنت صايمة وأنا بصور الكليب، لأننا كنا بنصوره فى رمضان، والكليب ده أساسا جزء من فيلم كوميدى اسمه "بالوظة" وجبنا المصور من الشارع يصور لنا الكليب"، وقررنا بعد النجاح اللى حققه إننا نغير اسم الفيلم من بالوظة إلى "ركبنى المرجيحة".
وتابعت، "أنا شايفة نفسى بعد 5 سنين هاكون فنانة مشهورة، لأن صوتى رقيق والجمهور بيطلب منى أعمل مهرجانات وكليبات أطفال، وناس كتير بتقولى استمرى فى نجاحك وملكيش دعوة بتعليقات أى حد، وأنا شايفة صوتى حلو وبالذات فى كليبات الأطفال، وفرضت نفسى على الساحة الفنية.
وأوضحت، "قبل عرض الكليب طلبت من المنتج اتفرج عليه لكنه رفض، بس الكليب مفيهوش حاجة وحشة، وأنا مبسوطة بيه، وبضحك لما بتفرج عليه".
واستكملت، "بحب كل جمهورى اللى بيحبنى وبزعل من اللى بينتقدنى بس بنسى وبسامح.. ولو اتصل أحد منتجى الأفلام السينمائية من أجل الظهور فقط فلن أوافق وهشترط إنى أظهر بجانب بطلة الفيلم".
وأضافت: "أنا مترشحة أدخل مسابقة ملكة جمال العرب ومدير المهرجان كلمنى وقالى أنتى هتكونى فى المهرجان، وأنا واثقة فى نفسى جدا، وقادرة على الفوز، والستات بتيجى جنبى فى الشارع تقولى بسم الله ما شاء الله من جمالى".
وعن حياتها الشخصية قالت، سبق ليا الزواج من إنسان كويس جدا ومعروف، وأى واحدة تتمنى تتجوزه ومعنديش منه أولاد بس محصلش نصيب نكمل، وحاليا أنا مش مرتبطة".
واختتمت حديثها، "أنا بحب صافيناز جدا وبحب صوتها، وليا الشرف إنى أكون شبهها، وبحب كمان محمد رمضان وهو ممثل جامد فى الرومانسى والكوميدى وكل أفلامه مفيش زيها، ونفسى أمثل فيلم معاه، أما بالنسبة للغناء فمثلى الأعلى الفنانة وردة الجزائرية.
يذكر أن فيديو كليب "ركبنى المرجيحة"، انتشر عبر ساحات مواقع التواصل الاجتماعى ، وأثار الجدل .