مذلوله بتبيع للأذلّ "اللعنة".. قصيدة جديدة لـ سعيد الشحات

ننشر قصيدة جديدة للشاعر سعيد شحاتة بعنوان " مذلوله بتبيع للأذلّ (اللعنة) ". مذلوله بتبيع للأذلّ (اللعنة) : إلى الثلاثي ناعوت/ برنس/ ودراع فرج لاكتع عميل الاحتلال جوّانا ميت مليون حسن عزّ الرجال ...................... (لها): بنت البياعه بأرخص الأتمان بنت الزمان الجاهل الأخرس ما اللى اتفطم ع الجوع وع الحرمان بيعيش حريص وان خان يكون أحرص يا خاينه قولى لقلبك الخوّان قلب الشرس لاجل البلد أشرس واللى اتعجن بفراسة الجدعان لو كان فرس يقدر يكون أفرس …………………. (له): طعم الخيانه أكيد على لسانك دوق دمّهم واتوضى بدموعهم واكسر شموعهم ربّما تقدر تقيد لكن ما تنساش الشهيد له حقّ وانّ اللى يوم انزقّ ع الناس انتهى أمره لحظة ما روحك تنطفى يحمى الوطن جمره ويعيش شهيدها زياده فوق عمره ............. إيه حال دموعك وانت بتطبّع إيه ملمس الإيد وانت بتسلّم على السفّاح هل كنت فرحان لمّا طرطش فوق تيابك دمّهم هل كنت حاسس بالعيال فوق التُّخت والموت بيلعب سيجا فى عنيهم وبيفصّل هدوم على قدّهم هل كنت شايف مدفعيتهم بتضرب طفل ماشى معاه ورود هل كنت سامع صوت صحابك ع الحدود هل كنت قارى تاريخ يهود المنطقه كويس هل قلبك ارتاح وانت بتهيّس وبتبيع للخسيس يا شهوة الحلم الرخيص ........... صوت أرضنا عالى ................. حقّ الشهيد جوّه القلوب غالى ................. دمّ الشهيد مالى الطرق علامات ...................... اعلم يا رافع راية الخواجات ..................... إنّ اللى شال الرايه له كرامات................. وانّ الوجع طارح بلح أمهات ................... قلب الشهيد عايش وقلبك مات ..................... **** (لها): طعم الخيانه أكيد بتتمنّيه وبتحلمى ف وسط الجناين بيه دوقى دماهم يا عديمة الشوف واتوصّى بالجهل اللى داخله عليه ............ إيه حالك سيادتِك وانتى رايحاله هل كنتى فاكره إنّ اللى بيبيع دمنا هيلبّسوه عمّة نبي هل كنتى حاسّه بقلب أمّ عيالها داس فوقهم سيور الدبابات هل شفتى كراسة ولد متعاصه دمّ هل حس قلبك بالدموع السخنه فى خدود البنات هل عرّفوكى زمان على معنى الحاجات مثلاً قالولك حاجه عن مغزى (الشهاده- الصبر، - أيتام الحروب -رِجل الضحية وهى بتسيب جسمه وتطير فى الهوا -قلب اتكوى بنار النابالم -تاريخ نضال الشعب والناس والملايكه عشان نحرر أرضنا -عرضك، لحمك إذا عراه جاسوس أو مغتصب - لون رمل سينا وهوّ بيطبطب على جتت الولاد -صوت الصراخ الله أكبر - طعم ريق العسكرى الصايم -غناوى الجبهه -أحلام دفعه كامله وهمّا بيصلّوا، المسيحى لدينه والمسلم لدينه وبعدها يتوحدّوا تحت العلم ويقولوا حرّيتنا أولى بدمّنا - إيد ربّنا والنور بيحرسهم - أطفال دموعهم فوق كراريسهم -معنى النشيد الصعب فوق ورق الكتاب.....) ……. ماذا إذا والدك حبيبك مات هناك علشان تراب علشان وطن مافيوش فلوس تكفى الجشع والذلّ واستعباد بشر مالهومش ذنب فى أى شيء غير إنّهم آدم علشان قضيّة ناس بتستعذب تبيع أرواحها وتصون عرضها _علشان مسيح/ مسلم / فقير عاش واتفطم على أرضها_ ماذا إذا حسيتى مرّه ببردها ف ليل احتلال بالصرخه فوق شط الكنال بالمدرسه ف وشّ العيال المدهوسين ماذا إذا طفلك حبيبك مات عشان ما عَرفش يهرب م الرصاص وعنيكى نامت بالخلاص واتأملّت هل كانت الدبّه اللى فيكى استكملت سكتها لسفارة العدو ماذا إذا جوزك حبيبك مات عشان شايل علم علشان يجيب الحق من بق اللى خان علشان ما يستسلمش للمنطق علشان غلابه بيحلموا بالشمس وفطير العسل علشان مثل بيقول: مانيش فاكره علشان جميل ناكره اللى مش فاهمين ما اعرفش مين أنتى ولا اعرف كنتى مين لكنّى مش فاهم لكنى فاهم بس مش عارف لكنى عارف بس مش قادر أقول لكنى قادر اقول وقلبى ما خلانيش دا لأنى كنت شاويش وكنت العسكرى والضحكه والرايه ولأنى كنت لبنت فلايه ولأنّى كنت لطفل برّايه لقلم مقصوف عايز أقول شيء لكن مكسوف دا لأنى كنت ألوف فى وقت الكَرّ كنت لوطن ضلايه وقت الحر إيه فكرتك عن هذه الأشياء (الحرب -ضرب النار -هدوم العسكري -صوت أمّ بتودّع ضناها عشان شهيد -صرخة طفوله والدها سابها وراح يقف ع الجبهه بهدومه الخفاف -أمر المواجهه ف حرب مش مضمونه بسلاح ماركته أقدم من التماثيل فى متحفنا العظيم - خطورة الضرب م الخندق -رهان القائد الفاهم على روح العساكر فى الطريق الصعب والسكّه الرصاص - وزن مدفع فوق كتاف واحد جريح -دعوات كتيره الفجر بتروح للسما من قلب مسلم أو مسيح -معنى إننا نهتف لها عامى وفصيح... ونقول لها تعيشي) إيه فكرتك عنّي غير إنّى ديب لابس حمل من وجهة النظر المريضه إيه فكرتك عن ضحكة الأرض المهيضه ف دمّنا غير إننا متاعيس إيه فكرتك عن قلب هذا التيس اللى عشقها وغنى لعنيها ورسمها شعاع أمل واتوضى بيه لصلاته واتيمم عشق الغلابه لأرضها بيزيد رغم إنّ عفش بيوتهم اتأمم إيه فكرتك عن قلب متعمم بكلمة أرض مسموعه عن راية البلد اللى راسك عمرها ما شافتها مرفوعه إيه قول جنابِك عن ميدان رمسيس عن ميكرباص إمبابه فى الصيف القطيع عن بهجة النيل فى الربيع إيه فكرتك عن معنى بيع الدّار لأنصار الدمار ليه تكرهى حرّيّه الأحرار؟ إيه شكل وشّك وانتى بتبيعى رغم إنى ما اعرفكيش أساسًا بس شكلك عار والصوره ما بتكدبش يا بنت الـ............ هل تعرفى معنى.......... هل تعرفى. ........ أو... هل........ مذلوله بتبيع للأذلّ والكلّ شايف والوطن معنى بيعى ببلاش واستحملى اللعنه .........................