أعلن صندوق التنمية الثقافية، إذا كانت الظروف تحول بيننا وبين إقامة أمسياتنا الشعرية الأسبوعية فى بيت الشعر، مركز إبداع الست وسيلة، فإننا يمكننا أن ننقل هذه الأمسيات الشعرية إلى هنا، وسننشر عددا من القصائد لمجموعة من الشعراء، منها قصيدة"يامنة" للشعر الكبير عبد الرحمن الأبنودى:
والله وشبت يا عبد الرُّحمان ..
عجّزت يا واد ؟
مُسْرَعْ؟
ميتى وكيف؟
عاد اللى يعجّز فى بلاده
غير اللى يعجز ضيف !!
هلكوك النسوان؟
شفتك مرة فى التلفزيون
ومرة .. ورونى صورتك فى الجورنان
قلت: كبر عبد الرحمان!!
أمال انا على كده مت بقى لى ميت حول!!
والله خايفة يا وليدى القعدة لتطول
مات الشيخ محمود
وماتت فاطنة ابْ قنديل
واتباع كرم ابْ غبّان
وانا لسة حية..
وباين حاحيا كمان وكمان
عشت كتير
عشت لحد ماشفتك عجّزت يا عبد الرحمان
وقالولى قال خَلَّفت
وانت عجوز خلَّفت يا اخوي؟
وبنات..!!؟
أمال كنت بتعمل إيه
طيلة العمر اللى فات؟
دلوقت مافقت؟
وجايبهم دِلْوكْ تعمل بيهم إيه؟
على كلٍّ..
أهى ريحة من ريحتك ع الأرض
يونسُّوا بعض
ماشى يا عبد الرحمان
أهو عشنا وطلنا منك بصة وشمة
دلوك بس ما فكرت ف يامنة وقلت: يا عمة؟
حبيبى انت يا عبد الرحمان
والله حبيبى .. وتتحب
على قد ماسارقاك الغربة
لكن ليك قلب
مش زى ولاد الكلب
اللى نسيونا زمان
حلوة مرتك وعويْلاتك
والاّ شبهنا..؟
سميتهم إيه؟
قالولى: آية ونور
ماعارفشى تجيب لك حتة واد؟
والاّ أقولك :
يعنى اللى جبناهم..
نفعونا فى الدنيا بإيه؟
غيرشى الانسان مغرور !!
ولسه يامنة حاتعيش وحاتلبس
لمّا جايب لى قطيفة وكستور؟
كنت اديتهمنى فلوس
اشترى للركبه دهان
آ..با ما مجلّع قوى يا عبد الرحمان..
طب ده انا ليّا ستّ سنين
مزروعة فى ظهر الباب
لم طلّوا علينا أحبة ولا أغراب..
خليهم..
ينفعوا
أعملهم أكفان..!!
كرمش وشي
فاكر يامنة وفاكر الوش؟
إوعى تصدقها الدنيا..
غش ف غش..!!
إذا جاك الموت يا وليدي
موت على طول..
اللى اتخطفوا فضلوا أحباب
صاحيين فى القلب
كإن ماحدش غاب..
واللى ماتوا حتة حتة
ونشفوا وهما حيين..
حتى سلامو عليكم مش بتعدي
من بره الأعتاب
أول مايجيك الموت .. افتح..
أو ماينادى عليك .. إجلح..
إنت الكسبان..
إوعى تحسبها حساب..!!
بلا واد .. بلا بت..
ده زمن يوم مايصدق .. كداب..!!
سيبها لهم بالحال والمال وانفد
إوعى تبص وراك..
الورث تراب
وحيطان الأيام طين
وعيالك بيك مش بيك عايشين..!!
يو.....ه يا رمان..
مشوار طولان
واللى يطوِّله يوم عن يومه يا حبيبى .. حمار
الدوا عاوزاه لوجيعة الركبة
مش لطوالة العمر.
إوعى تصدق ألوانها صفر وحمر.
مش كنت جميلة يا واد؟
مش كنت وكنت
وجَدَعَة تخاف منى الرجال ..؟
لكن فين شفتونى ..؟
كنتوا عيال.!!
بناتى رضية ونجية ماتوا وراحوا
وأنا اللى قعدت..
طيِّب يا زمان..!!
إوعى تعيش يوم واحد بعد عيالك
إوعى يا عبد الرحمان..
فى الدنيا أوجاع وهموم أشكال والوان..
الناس مابتعرفهاش..
أوعرهم لو حتعيش
بعد عيالك ماتموت..
ساعتها بس ..
حاتعرف إيه هوّه الموت..!!
أول مايجى لك .. نط
لسه بتحكى لهم بحرى حكاية
فاطنة وحراجى القط..؟
آ.. باى ماكنت شقى وعفريت
من دون كل الولدات..
كنت مخالف..
برّاوي..
وكنت مخبى فى عينيك السحراوي
تمللى حاجات..
زى الحداية ..
تخوى ع الحاجة .. وتطير ..
من صغرك بضوافر واعرة .. ومناقير..
بس ماكنتش كداب..
وآدينى استنيت فى الدنيا
لما شعرك شاب..!!
قِدِم البيت..
اتهدت قبله بيوت وبيوت..
وأصيل هوه..
مستنينى لما أموت..!!
حاتيجى العيد الجاي؟
واذا جيت
حاتجينى لجاي؟
وحتشرب مع يامنة الشاى ..؟
حاجى ياعمة وجيت..
لالقيت يامنة ولا البيت
ويشار إلى أن الشاعر عبد الرحمن الأبنودي (11 أبريل 1938 – 21 أبريل 2015)، شاعر مصري ولد عام 1938 في قرية أبنود بمحافظة قنا في صعيد مصر، لأب كان يعمل مأذوناً شرعياً وهو الشيخ محمود الأبنودي، وانتقل إلى مدينة قنا وتحديداً في شارع بني على حيث استمع إلى أغاني السيرة الهلالية التي تأثّر بها. الشاعر عبد الرحمن الأبنودي متزوج من المذيعة المصرية نهال كمال وله منها ابنتان آية ونور.
كتبه من أشهر أعماله السيرة الهلالية التي جمعها من شعراء الصعيد ولم يؤلفها. ومن أشهر كتبه كتاب (أيامي الحلوة) والذي نشره في حلقات منفصلة في ملحق أيامنا الحلوة بجريدة الأهرام تم جمعها في هذا الكتاب بأجزائه الثلاثة، وفيه يحكي الأبنودي قصصاً وأحداثاً مختلفة من حياته في صعيد مصر.
دواوينه الشعرية الأرض والعيال ، الزحمة
عماليات، وجوابات حراجى القط ، الفصول، وأحمد سماعين ، انا والناس، وبعد التحية والسلام، وجوه على الشط صمت الجرس (1975 - 1985).
المشروع والممنوع (1979 - 1985).المد والجزر (1981) قصيدة طويلة، الأحزان العادية (1981) ديوان مكتوب دراسة (محمد القدوسى).
السيرة الهلالية (1978) دراسة مترجمة، الموت على الأسفلت (1988 - 1995) قصيدة طويلة، سيرة بنى هلال الجزء الأول (1988).سيرة بنى هلال الجزء الثاني (1988).سيرة بنى هلال الجزء الثالث (1988).سيرة بنى هلال الجزء الرابع (1991).سيرة بنى هلال الجزء الخامس (1991).الاستعمار العربي (1991 - 1992) قصيدة طويلة.
