"من ضفايرها نازل البرقوق زبايط" قصيدة جديدة لـ الشاعر ماهر مهران

ننشر قصيدة جديدة للشاعر ماهر مهران بعنوان "من ضفايرها نازل البرقوق زبايط" والتى يقول فيها: كانت بتمشى والخريطة ف إيدها عروسة ملبن.. كلـــــــنا بنريدها تقف .. تلاقى العســل منها سايل تمشى يا دين النبى على مشيتها!! تسألنى عن لونى اللى بيتخطف لما إيدى تحضن إيدها ساعة السلام.. وأحكى لها عن ولد تاه فى بلاد الله ومن كتر الشقا مش عارف ينام.. فـ تضحك وتقول لي: ياسلام لم يا صعيدى يا سلام وتروح من الدنيا وأتوه، وما اعرفش النهاردة إيه ولا حتّى الساعة كام؟!! تفرّجنى على الغزالة وهى بتتسبّح فى منابع النيل.. تفط من عينى دمعة فى الوقت اللى فيه خلصت منّى علبة المناديل.. ما أنا حزين بس مش عامل حسابي وهى وحش حنان بس ملجّمها الشموخ.. بصيّت فى عينيها مع إنى باتكهرب وأدوخ.. ضحكت وقالت: إيه يا صعيدى، عجبتك التضاريس؟ قلت لها: يانوفا عجبتنى ــ بس والله العظيم ــ عجبتنى عشان بتشبه لك وعشان أنا أشبه للعريس !! وطرى الملبن وسال العسل.. وحليت الدنيا قوى قوي واستخبّا الكسل وشع الشفق من الغمازتين وابتدت ريحة الربيع تمرمتنى على الجنبين وهى تضحك وتقول لي: ياصعيدى رحت فين؟ يخرب بيت فقرك هاتفضحنا.. وتفرد خريطة فيها الحجر عاشق والدهشة سهم راشق والصّوان دايب دوب وتحكى لى على المكتوب اللى خلا تينها الندى يتيابس.. وخلّا رمانها العفى يكرمش فوق رقبة جمل تحت عيون قتالة وتلبسها الحالة وتتكحّل وتبص فى المراية وأخاف عليها لأحسن من كتر الجمال تتعفرّت ف أكلمها عن حبيبها اللى خطفته منها الجبال وضلها اللى فى التلج إتْفحّم وولدها اللى مش راضى يجي وكل ما تفتكره ياكلها صدرها وتتألم وحلاوتها الزيادة اللى عيَّشتها ف تعاسة.. وفى انتكاسة رمتها ف طريقى ف تقول لي: بس ياصعيدي كفاية بقا !! فـ أضحك وأخلّى كلامها ده لمحمولى رنّة.. وهى تبكى وترسم خليجين بيحضنوا ف الجنة وبيحضنوا نعناع وشجر حنة ومية صافية تشبه مية منابع النيل وبنت ضل الله ماخلق فاقت فى الجمال الحد بنت يشتهيها الإمام فى الحج بنت اسمها نوفا وف إيدها خرايط ومن ضفايرها نازل البرقوق زبايط بياكل منها كل اللى بيحب الفجر وهوّ بيشقشق.. واللى بيفرح لما يلقى وردة منقوشة ف حجر بترتوى وتطقطق.. والحزين اللى مات أبوه وخلصت منه علبة المناديل والشقيان اللى مش عارف ينام!! فـ تضحك وتقول لي: ياسلام لم ياصعيدى ياسلام يا سلام لم ياصعيدى ع الكلام وتروح من الدنيا زى حبة عطر تروح وتسيب خرايطها وسحر طلتها وضحكتها لى عكاز أتحامى بيه كل ما تزيد الرياح وقلة الأصل وديابة الصحرا !!