مفطّراتى (6)

مفطّراتى.. ماشى بآلاتى ويّايا طبله.. بانده يا أبله عنتر يفطّر حبيبته عبله ويّايا آله.. ماشيه بتكاله شاعر يا خاله ومغنّواتى مفطّراتى.. ماشى بآلاتى بنقول له يالله يا مأدّناتى ادّن وكبّر.. الفول مشبّر والباميه.. تسلم.. إيدين مراتى فوزى ابن عمّى.. صان يومها دمّى لمّا البحيره شدّت لى كمّى يا شمس طالعه.. حصّة مطالعه أرضى الشريفه.. أزهر وقلعه أهرام عظيمه.. تواريخ عزيمه ونضال وفطره.. حُرّه وسليمه ناصر.. ساداتى.. ريّس.. ساعاتى زرعتنا فالحه... يا مطيّباتى طمّن غريمنا.. صاحيين ما نمنا ماشيين بكيفنا.. ولا شىء هاممنا روّق يا خوجه... يا ابو سنّه عوجه عامل مليجى.. والأصل نوجا هذا أوانى.. شاعر ميدانى لفّيت حوارى.. ساعة العصارى ومشيت أغنّى فوق الكبارى: ● ● ● اصحوا عشان هلّ الهلال وإجابتى كانت على السؤال نفسى ف فانوس زى العيال خبّطت فوق جنبى الشمال ومشيت أغنّى وأضحك وأهنّى وكإنّ خصمى صار حتّه منّى وكأنّى غيرى.. فارش حصيرى وبقلبى صابب للناس عصيرى صحصح يا مينا وادعى لأمينه ● ● ● الفجر زهّر وسط الجنينه «صوموا تصحوا»: دا كلام نبينا صحصح يا خالى واسمع سؤالى من امتى أرضى ما كانتش أرضى وإزاى جِمالى تنطح جِمالى بإيديّا قادر أرسم حضارتى وبروحى واقف أحفر كنالى صحصح ونادى.. عاشت بلادى الله أكبر... ماشيين نكبّر صابرين ولسّه قادرين نصبّر واقف وبابنى علشان ولادى رمضان أتانا.. بيّت حدانا والصبح صلّى ولعب معانا