مفطّراتى (8)

مفطّراتى.. ماشى بآلاتى ويّايا طبله.. بانده يا أبله عنتر يفطّر حبيبته عبله ويّايا آله.. ماشيه بتكاله شاعر يا خاله ومغنّواتى مفطّراتى.. ماشى بآلاتى بنقول له يالله يا مأدّناتى ادّن وكبّر.. الفول مشبّر والباميه.. تسلم.. إيدين مراتى أحمس فى طيبه.. جهّز كتيبه حارب وأجهز على المصيبه افطر يا غالى.. وادعى لعيالى يا شاويش عطيّه.. حطوا المخالى حيّوا علمنا.. يجعل كلامنا بعد المداوله... سكّر وسمنه يا خالتى بيهه.. قولى لنبيهه تفرد إيديها... للى يناديها الرحمه حلوه... والوصل سلوى وشّ العروسه محتاج لجلوه أحمس فى طيبه.. جهّز كتيبه جيش الأعادى ما أخدش غلوه ماشى بافطّر.. أرسم واسطّر وان سبت روحى.. بأنده واكتّر هذا أوانى.. والشعر مَطّر لفّيت حوارى.. ساعة العصارى ومشيت أغنّى فوق الكبارى: ● ● ● صحصح يا تونسى.. صاحبك جاهينى حدّاد ماليلى بالشعر عينى أبنودى.. طه.. ثومه ونداها صوت الفاجومى والشيخ وراها مصر النهارده سمعت غناها مسلم/ مسيحى عامّى وفصيحى شى الله يا سيدنا جوّا الضريحى نفسى ف فانوسى وبقيت فلوسى وف دعوة أمّى وعلاج ضروسى صوموا تصحّوا.. درسى الخصوصى صحصح يا مينا.. ماشيه السفينه والدعوه عامه للى يعادينا قرّب وجرّب... اعرب وعرّب سيف الفراعنه لسّه ف إيدينا ● ● ● مفطّراتى.. ماشى بآلاتى ويّايا طبله ومغنّواتى بنقول له يالله يا مأدّناتى ادّن وكبّر.. الفول مشبّر والباميه.. تسلم.. إيدين مراتى