مفطّراتى.. الحلقة العاشرة

مفطّراتى.. ماشى بآلاتى ويّايا طبله.. بانده يا أبله عنتر يفطّر حبيبته عبله ويّايا آله.. ماشيه بتكاله شاعر يا خاله ومغنّواتى مفطّراتى.. ماشى بآلاتى بنقول له يالله يا مأدّناتى ادّن وكبّر.. الفول مشبّر والباميه.. تسلم.. إيدين مراتى فوقوا تصحّوا.. لاحسن تكحّوا عساكرنا عدّوا الكنال وضحّوا الله أكبر.. اضرب وعبّر وفوت وخطّى.. واكتب بخطّى ع الضفّه صابر وعاش يصبّر الدانه نازله.. وسط المُنازله ورصاص ولادنا شغّال مغازله فى صدور كئيبه.. ماليه الزكيبه اضرب يا مصرى.. ردّ الحبيبه صايم وصوتى.. زلزل بيوتى طالع سلاحى.. ملفوف بموتى هذا أوانى.. هازز سكوتى لفّيت حوارى.. ساعة العصارى ومشيت أغنّى فوق الكبارى: ............... يا مصر يا أم الحديت أغانى يا مُبدعانى ومغلّبانى يا احلى معنى وسط المعانى يا مغرّبانى ومحنّنانى حانيانى لكن محنيّانى عاشقك مداين ودين وداين وكلمه واقفه تسقى الجناين عاشقك وماشى بارسم ملامحك وان كنتِ ناسيه.. فالله يسامحك ردّيلى روحى اللى رايحه ليكى وادّينى عادتى من نور عنيكى ابنك شاريكى.. نفسه يفاديكى هلّ الهلال ده منّك وبيكى رمضان لاممنا.. والخير عاممنا مسلم/ مسيحى.. نيلك آممنا وفطارنا فيكى من خير إيديكى والدعوه عامه للى يعاديكى ................. مفطّراتى.. ماشى بآلاتى ويّايا طبله ومغنّواتى بنقول له يا الله يا مأدّناتى ادّن وكبّر.. الفول مشبّر والباميه.. تسلم.. إيدين مراتى