مفطّراتى.. ماشى بآلاتى
ويّايا طبله.. بانده يا أبله
عنتر يفطّر حبيبته عبله
ويّايا آله.. ماشيه بتكاله
شاعر يا خاله ومغنّواتى
مفطّراتى.. ماشى بآلاتى
بنقول له يالله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى
شوارعنا نورها.. قايد بدورها
وبيوتها واقفه بتباهى دورها
والخلق فيها بتأدّى دورها
ناسنا البريئه وفّت ندورها
مبدوره طيبه.. طاب مين بدرها؟
شوارعنا فيها.. ريحة ناشيها
عِترتها صوته.. يرعب واشيها
حواشيها مسجد ف إيد كنيسه
وأيادى طاهره ونفوس نفيسه
قدرت تحارب ابن الخسيسه
بسبوسه طازه.. للبنت ظاظا
لبّ وسودانى.. للشاب هانى
فلفل وأوطه... واطباق وفوطه
ترقيصه واحده.. واقفل بشوطه
مخلوطه جايز.. هنا القزايز
شوارعنا خيرها كان للى عايز
ادخل وسمّى.. واغسل وحمّى
هذا أوانى.. يا دعوة أمّى
لفّيت حوارى.. ساعة العصارى
ومشيت أغنّى فوق الكبارى:
● ● ●
يا مدينه بَدِينه وضلوعك رحايه
ضحكتك كرباج وتنهيدك عصايه
وانكسارك صمت بيهدد مدايا
ابتديت أول خُطايا بسيف وجِبّه
ابتديت أرسم وطن محكوم بقُبّه
وابتديت أحلم وطال الحلم حبّه
مصر يا أعظمها شابه ف كل حاره
يا اختصار البحر فى حكايه ومحاره
يا انتظار المارد ال وقف يهاتى
يا ازدهار الورد فى عيون العذارى
مصر يا عشوش بوص...
يا غنّيوة وجع
يا جبال حضاره
مصر يا بيوت ناسى
يا قصر الدوباره
كلنا رهن الإشاره
● ● ●
مفطّراتى.. ماشى بآلاتى
ويّايا طبله ومغنّواتى
بنقول له يالله يا مأدّناتى
ادّن وكبّر.. الفول مشبّر
والباميه.. تسلم.. إيدين مراتى