أعلنت مصممة الأزياء ريم العدل عن مبادرة جديدة لتصنيع الكمامات القماشية لسد العجز فى نقصها لمكافحة انتشار عدوي فيروس كورونا، وكتبت عبر حسابها بموقع "انستجرام" :"بخصوص مبادرة صنع الكمامات، احنا بعد البحث والاستشارة، قررنا إن الكمامات اللي هنعملها هتبقى للاستخدام الشخصي للناس العادية للوقاية فقط عشان نحاول نوفّر الكمامات الطبية اللي في السوق للناس العاملين في القطاع الصحي أو لأي فئة معرّضة للخطر بشكل أكبر من العادي".
وتابعت :"حابة أشكر @salemaltamoda اللي هيوفروا القماش اللازم لصنع الكمامات.. و اشكر الجدع @refaatabdelhakim اللي هيتولي تنفيذ الكمامات في ورشته.. شكراً جداً على مجهوداتكم ومساعدتكم".
وأضافت:"بالنسبة لأي حد عنده ماكنة خياطة في البيت ويحب يساعد معانا، في خيارين يا إما نوصلله القماش اللازم يا إما ندله على نوع الأقمشة الموصى بيها لو هو يحب يجيبها بمعرفته والطريقة طبعاً. في الحالتين، تواصلوا معايا وإن شاء الله أقدر أفيدكم..الخطوة الجاية بقى هي تحديد نقط التوزيع وأتمنى تشاركوني بأفكاركم وخبراتكم في النقطة دي، نبدأ فين وإزاي؟".
وأختتمت كلامها قائلة: "ملحوظة: هنزل على الستوري طريقة بسيطة ممكن أي حد يتبعها لو حب يصنع الكمامة بنفسه سواء عنده ماكنة خياطة أو لأ، بس خلوا بالكم كويس من الإرشادات وتعليمات الاستخدام سواء هتستخدموا الكمامة دي لنفسكم أو تتبرعوا بيها * الصورة المرفقة للتوضيح فقط".
وكانت احتفلت مصممة الأزياء ريم العدل، بعيد ميلاد والدها المنتج محمد العدل، بداية شهر يناير الماضى، ووصفته بأنه أعظم أب وأعظم جد.
ونشرت ريم، عبر حسابها على انستجرام، عدة صور لها مع والدها وصورا أخرى لابنتها مع جدها، صحبتها بتعليق: "كل سنة وأنت أعظم أب وأعظم جد ربنا يخليك لينا وما يحرمنا منك أبداً يا حبيبى".
