نوفمبر شهر الوقوع فى الحب.. سألنا الشباب انتوا وقعتوا فى إيه؟ اعرف إجابتهم

يردد الكثيرون أن شهر نوفمبر هو شهر الوقوع في الحب، فمنهم من يتغنون بقصائد الشعر، ومنهم من ينشر بعض الأغنيات، ومنهم من يسجل لحظاته السعيدة أيضاً، ووضعها كـ "ستوري" عالسوشيال ميديا مع أصدقائهم، والآن مع اقتراب نهاية الشهر، طرح "انفراد" على عدة أشخاص سؤالاً، لو أن شهر نوفمبر هو شهر الوقوع في الحب.. انت وقعت فى إيه؟ الشباب يجيبون.. ديون وانفصال ومولود جديد محمد.ج 27 سنة يعمل محاسبًا فى شركة قال: "وقعت في ديون عشان خاطب وبجهز الشقة، أنا وقعت في الحب من 5 سنين مع بنت الحلال اللي اختارها قلبي، لكن من ساعة ما خدت قرار الارتباط رسمي وانا مش بقع غير في ديون"، وتابع: "أي وقت في السنة ممكن الواحد يقع فيه في الحب، إنما شهر نوفمبر بس دي اللي غربية". أما أحمد. س المهندس الأربعينى قال: "وقعت في انفصال، كان من كام يوم، وحزنت جدا لأنه قرار جه بعد عشرة سنين"، وتابع: "مش كل حاجة على الفيس بوك نصدقها، وقوع في الحب ايه ده، أنا حظى فى نوفمبر دايمًا سىء". يحيى. س صاحب الـ 35 عامًا ويعمل صيدلانيا كان له رأي مختلف بعض الشيء حيث رزقه الله بمولودة جديدة لأسرته الصغيرة قائلا: "بقيت بابا من 20 يومًا بالظبط، ووقعت فعلا في حبها، يمكن لأول مرة أحس إن فعلا نوفمبر يستاهل انه يبقى شهر الوقوع في الحب". الفتيات يجبن.. خيانة ومقابلة عمل و"نييولوك" أما بالنسبة للفتيات كانت لهم آراء متباينة، فمنهن من وقعت فعليا في الحب، ومنهن من اختارت توجيه حياتهن للعمل مثلما فعلت إنجي. م صاحبة الـ 25 عاما قائلة: "هدفي من يوم ما اتخرجت اني أشتغل في مكان مرموق، وتأهلت لكدة وعملت فعلا انترفيو للعمل أول نوفمبر" وتابعت: "مش بهتم بالأشهر ولا الأيام ولا حتى السنين اللي بتعدي مدام معملتش فيها حاجة مفيدة لنفسي". وقالت سحر. س الفتاة العشرينية إن نوفمبر جاء ومعه خبر صادم لها حيث اكتشفت خيانة حبيبها بعد قصة ارتباط طويلة "عرفت بالصدفة إنه متفق مع واحدة تانية عالزواج، بعد ما صبرت جنبه 6 سنين، طلع كان بيحوش عشان يخطبها هي" ولازالت سحر تحت أثار الصدمة فأردفت باكية: "يوم 12 نوفمبر نسي تليفونه معايا ولقيت رقم بيتصل افتكرت انه بيتصل من رقم غريب، طلعت هي بتتطمن عليه، ولما سألتها انتي مين حكتلي قصتهم كلها وانه مرتبط بيها من سنة". وعن رأي مريم. أ عن نوفمبر وتلقيبه بشهر الوقوع في الحب قالت: "انا منعزلة ومعرفش الأيام من بعضها، كل اللي بعمله لما بحس إن فيه يوم مميز بحتفل وبعمل نيولوك ليا يغير من الموود"، وتابعت: "الست لما بتكون قوية ومهتمة بنفسها ومركزة على مستقبلها كتير جدا هيقعوا في حبها"