ريهام حولت بكيزة وزغلول وعلاء الدين وياسمين لاكسسوارات أنيقة بالخشب والألوان

عشقت الرسم منذ طفولتها واتخذته وسيلة للتعبير عن ذاتها وكل ما تشاهده فى حياتها من أشخاص ومناظر طبيعية، ورغم دراستها للفلسفة، إلا إنها لم تنس شغفها وحبها للرسم، لذا حرصت على تعلم قواعد الرسم والتمرن على رسم العديد من اللوحات الفنية، حتى استطاعت أن تطور من نفسها، ولأنها عاشقة للمشغولات اليدوية وخاصة الإكسسوارات، فكرت ريهام جمال، البالغة من العمر 25 عاماً، في رسم لوحات فنية صغيرة على الأقراط والسلاسل والأساور التى تصممها. تحدثت ريهام، لـ"انفراد"، عن تجربتها فى الرسم على الإكسسوارات، قائلة :" فكرت أجمع بين حبى للرسم والإكسسوارات من خلال الرسم بألوان مبهجة على إكسسوارات من تصميمى، وبدأت أصمم أول قطعه إكسسوار، ولقيت رد فعل حلو جداً، وناس كتير شجعتنى أكمل". وتابعت :" اختارت خامة الخشب فى تصميم الإكسسوارات، لأنها خامة قيمة ومسطحة وصلبة، أقدر ارسم عليها، كمان عملية بتعيش لفترة طويلة من الوقت، ومع الوقت بدأت أجرب أنواع كتير من الأخشاب والألوان، وأتمرن على الرسم على مساحة صغيرة جداً، وبعد تجارب كتير، قدرت أطور من نفسى وأعمل إكسسوارت". وعن مراحل تصميم الإكسسوارات الخشبية، قالت ريهام:"كل قطعة اكسسوار، بتمر بمراحل كتير، منها تقطيع الخشب والصنفره وتحضير الخشبة والرسم عليها وبعدين الورنيش اللى بيترش عليها، وكمان بحرص على إنى اختار فى رسوماتى، شخصيات بتعبر عن الثقافة المصرية، فعملت حلقان نوبية وفرعونية وأفريقية وحلقان من الفلكور الشعبى، وكمان صممت اكسسوارات بلوحات فنية عالمية معروفة زى لوحة ليلة النجوم للفنان العالمى، فان جوخ". تستخدم ريهام خيالها فى رسم الأشخاص المصرية، وتطلق عليهم أسامى مصرية قديمة، حيث قالت :"بجيب ورقة وقلم وبتخيل الشخصية اللى عايزاها وأرسمها بأكتر من شكل لحد ما استقر على الملامح اللى عايزاها وأبدأ أنفذ و بسميها بأسم يليق عليها زى حلق لواحظ أو بسيمة وبرسم شخصيات مشهورة زى بكيزة وزغلول، وده كان بناء على طلب عميلة، ورسمت برضه شخصيات كرتونية زى علاء الدين والأميرة ياسمين". ترسم ريهام على الإكسسوارات، بناء على طلب البعض، بعضهم له طلبات مميزة وغريبة بعض الشىء، حيث قالت :" ناس بتطلب منى ترسم نفسها على الحلق، وناس كتير طلبت منى أرسم قططها وكلابها على الحلق، وناس بتطلب منى أرسم فرده شكل والفرده التانية شكل تانى خالص". وأنهت ريهام حديثها عن أحلامها التى تتمنى تحقيقها فى المستقبل، حيث قالت :"نفسى أفتح جاليرى، يضم شغلى كله، وأبقى ماركة مشهورة، ومشاهير الفن يروجو لشغلى، من خلال لبسهم ليها فى المسلسلات واللقاءات التليفزيونية".