عود البطل ملفوف.. "عبير" بترسم الحكم والأغانى الشعبية على الشرابات والمجات

عشقت فن الرسم منذ نعومة أظافرها، فكانت حصة الرسم من الحصص المدرسية المفضلة لها، والأقلام الملونة كانت وسيلتها للتعبير عن مشاعرها، ونقل كل ما يجذب عينيها، من جمال الطبيعة وقطع الأثاث المميزة بمنزلها، ورغم دراستها لمجال السياحة والفنادق بجامعة الإسكندرية، إلا أنها لم تنسى هوايتها القديمة، وحرصت على تنميتها، واتخاذها كمصدر دخل لها. لم تكتفى عبير محمد، خريجة السياحة والفنادق، بالرسم على الورق فقط، بل تعتبر أن كل شىء حولها يمكن الرسم عليه، وتجميله للأفضل، فاتجهت مؤخراً للرسم على الأكواب والجوارب والملابس أيضاً، حيث قالت خلال حديثها لـ"انفراد": "من صغرى بحب الرسم وبدأت مؤخراً أنمى موهبتى، وأرسم على كل حاجة حواليا فى البيت من مجات وشرابات وملابس، وأصور شغلى وأنشره على صفحتى، وده عجب ناس كتير، وشجعونى على إنى أستمر فى الرسم ومن هنا جت فكرة مشروعى وهو الرسم على الملابس والشرابات والمجات". تقابل "عبير" بعض الصعوبات أثناء رسمها على "المجات" والملابس وغيرها من المنتجات التى ترسم عليها، حيث قالت: "حرصت على تطوير شغلى بالممارسة والتجربة، لحد ما وصلت للنتيجة دى وحسيت إنى راضية عن نفسى، لكن فيه صعوبات بتقابلنى فى الشغل، زى إنى لازم أهتم بالتفاصيل الصغيرة عشان الرسمة تطلع مظبوطة مع الخامة اللى برسم عليها اللى بتكون صعبة وحجمها صغير زى الشرابات والمجات". تحرص عبير على رسم الشخصيات الكرتونية والكوميدية المفضلة للكثير من الناس، على الشرابات والشنط مثل شخصية "الست جواهر" بفيلم "الناظر"، بالإضافة إلى كتابة بعض الحكم والأغانى الشعبية، مثل أغنية "عود البطل"، حيث قالت: "بختار الشخصيات اللى بحبها وبتنجح مع الناس والرسمة ممكن تاخد منى يومين وبكون حريصة إنى استخدم ألوان ثابتة، وكل شغلى هاند ميد، عشان كده لازم يتغسل يدوى". وتابعت "الفترة الأخيرة، بدأت أرسم على الشنط، والرسمة أحياناً بتكون حسب طلب الزبون اللى بيطلب اسمه يتكتب أو رسم حاجة بيحبها على شراب أو مج أو شنطة". وأنهت عبير حديثها، بذكر حلمها الذى تسعى لتحقيقه، حيث قالت "أنا بعمل الحاجة اللى بحبها ومبسوطة بيها، لكن نفسى شغلى يكبر ويوصل لناس أكتر".