سألنا الشباب..إيه أقرب طريق لقلب الراجل؟ الحنية قبل الأكل و"روقة" نموذجًا

مع اختلاف الوقت والميول والاهتمامات لم يعد الطريق إلى قلب الرجل معدته، لكن الآن أصبح الطريق لغزاً محيراً، وقام "انفراد" بطرح سؤالاً على مجموعة من الرجال عن أقرب الطرق لقلوبهم وجاءت الإجابات متنوعة بدرجة كبيرة، ومختلفة باختلاف الأشخاص، إلا أن بعض الرجال اتفقوا على بعضها، وإليكم أبرز الإجابات. الدلع وقت الدلع و العقل وقت العقل: جاءت إجابات الشباب من الرجال طريفة تارة وعقلانية وجادة تارة أخرى، حيث قال محمود الباز صاحب الـ 30 عاما إن أقرب طريق للرجل تتحدد في ثلاثة نقاط وهم الحنية والثقة و"سمعان الكلام وإنها تكون "روقة" بطلة فيلم العار في نفسها"، وتابع: "الحلاوة والشكل والأكل بيجوا بعد كدة، الحياة من غير ثقة بالتحديد بتخلي الدنيا متمشيش بين أي اتنين، لأن الثقة بتكبر الحب وتخليه يدوم." أما أحمد الجداوي صاحب الـ 38 عاما قال: "الدلع وقت الدلع والعقل وقت العقل، الست لازم تعرف إيه المطلوب منها وفي أي وقت، لازم يكون عندها الأشياء دى عشان تعرف تمشي أمورها." أما محمود نجاح الشاب الثلاثيني فقال أن أقرب طريق لقلب الرجل هو اختلاف الطرفين عن بعضهم البعض، وأشار لازم نكون مختلفين عن بعض عشان يبقى فيه حماس في العلاقة وقرب دايم بينا"، وتابع: "مش صح نكون شبه بعض في كل حاجة عشان هيحصل ملل وزهق." "الوضوح.. يعني أما يقولها مالك تقول من أول مرة" هكذا أجاب محمد حمدي صاحب الـ 34 عاما، وأضاف قائلاً: "لو الست محطتش الراجل في مقارنات هتقرب لقلبه، حتى لو المقارنات دي في صالحه، والوضوح أهم شيء في العلاقة وبيخليها تستمر." وأكدأحمد محسن صاحب الـ 38 عام على الاهتمام قائلاً: "هو الاهتمام اللي بيجيبنا على ملا وشنا، وسر السعادة بين أي اتنين هوالاهتمام، ويا سلام لو كان متبادل." البنات يفضلن أنك تكوني طبيعية وحنينة: وعلى جانب الآخر، كان للجنس الناعم رأي في ذلك السؤال، وجاءت إجاباتهن عن أقرب طريق لقلب الرجل هو الحنان والعطف على الرجال، فقالت رغدة العطيفي إن أهم شيء يميز الأنثى هو حنانها، وتابعت: "إنك تكوني طبيعية ويا سلام لو طبيعتك حنية ورقة ودلع وتقدري تبقى صاحبته." أما إنجي هشان فقالت: "الاهتمام والحنية ويجي بعدها أي حاجة تانية، آخر حاجة بيفكر فيها الراجل هي الأكل"، وكانت الإجابة مشابهة لـ رانيا محمود التي أوضحت أن الثقة والصداقة قبل الإرتباط يوطد التقارب، وأكدت أن الثقة تزيل المشكلات إن وجدت.