5 شابات حولن شغفهن بالحضارة المصرية لبراند حلى.. كل قطعة معاها معلومة تاريخية

بفضل التقدم المبهر خاصة على مستوى الفنون والعمارة في الحضارة المصرية القديمة، ظلت لسنوات طويلة مصدرًا لإلهام الفنانين في مختلف أنحاء العالم، من اللوحات الفنية إلى الأزياء والإكسسوارات وحتى الديكور. وكانت أيضًا مصدر إلهام 5 شابات من خريجي الفنون الجميلة حولن شغفهن بالحضارة المصرية إلى مشروع إكسسوارات مميز، ويقدمن مع كل قطعة حلي معلومة عن الحضارة المصرية القديمة. "الحضارات القديمة مليئة بالحكايات والأساطير والأسرار" جملة قالتها منار محمد لـ"انفراد" وهي تحكي عن المشروع، وأضافت "فكرنا ازاي نستغل موهبتنا في التصميم مع شغفنا بالحضارة المصرية اللي ارتبطنا بيها وبجمالها من خلال دراستنا في الكلية وده كان بسب تجربتنا الأولى في عمل الهاند ميد من خلال مشروع اتكلفنا بيه في الكلية وهو اننا نشتغل علي منتج مستوحى من حضارات قديمة". وتابعت "احنا 5 بنات اصحاب،أنا ودارين علاء، يارا عيد، يارا محمد، دينا طارق، اتخرجنا من كلية الفنون الجميلة قسم ديكور سينما ومسرح، من وقت ما عملنا مشروعنا الدراسي ونجح جدا وانبسطنا بنجاحه قررنا نعمل ماركة خاصة بينا لتصميم الحلي مستوحى من رموز الحضارات المصرية القديمة،اخترنا لها اسم فرعوني، وده قبل التخرج بسنة، ولأن الحاجة اللي ليها حكاية ومعنى هي دايماً الأقرب لقلبنا، حبينا يكون في قصة لكل قطعة حلى، قصة تعرفك اكتر عن تاريخ بلدك، وتقوي اعتزازك بيها،تحت شعار قطعة واحدة = معلومة واحدة". أوضحت منار:" بنستخدم ورق البردي عشان نحكي قصة كل قطعة حلي، يعني مع كل قطعة بنحط ورقة فيها اسرار القطعة دي"، وتابعت منار "هدفنا من الماركة هو أن كل الناس تعرف اكتر عن حضارتها، هدفنا هو الحفاظ على الهوية المصرية، وأننا نعتز بكوننا مصريين" وعن الخامة المستخدمة قالت الخامة بين النحاس المطلي دهب عيار 18، وبلاتين والجلد الطبيعي". اما عن ترويج المنتجات قالت إن المنتجات الخاصة بهم يتم عرضها فى "جاليرى" بالزمالك، وعلى منصات التواصل الاجتماعي أيضا وقالت "بدأنا بفعل كل شيء بأنفسنا، ولم نطلب مساعدة من أحد". اما الصعوبات التي واجهتهن فقالت " طبعاً اننا كلنا بنات وتعاملنا كله مع صنايعية وساعات كتير بنشتغل لحد وقت متأخر وطبعا ده عملنا مشاكل كتير مع اهالينا وده كان لإثبات نفسنا في البداية، كمان احنا بدأنا و منعرفش حاجة لأننا دارسين تصميم بس مدرسناش ننفذ ازاي لفينا على كل الورش عشان نتعلم ونفهم ممكن ننفذ ازاي وكمان بدأنا المشروع بمبلغ بسيط جدا مكنش بيقدر يخلينا نعمل حاجات كتير". واختتمت منار"احنا لقينا نفسنا لازم نكون فاهمين وعارفين كل حاجه تقدر تخدم مشروعنا فاتقسمنا وخدنا كورسات تسويق وبزنس وسوشيال ميديا وفوتوشوب فدرسنا كل حاجة لأننا إحنا اللي بنعمل كل حاجة محدش معانا".