جهاد صممت باقات ورد غير تقليدية لعيد الأم.. بطعم القهوة وصوت أم كلثوم

يبحث الأبناء خلال هذه الفترة عن هدية مناسبة لأمهاتهم، مختلفة عن الأعوام الماضية، وتتسم بالرقة والعملية فى بعض الأحيان، ليعبرون بها عن مدى حبهم لأمهاتهم، ولذلك فكرت جهاد أحمد فى تصميم هدايا مختلفة بمناسبة عيد الأم، من خلال تصميم باقة زهور مضاف عليها بعض الأشياء المفضلة للأم مثل فنجان للقهوة وبعض قطع الشيكولاتة وغيرها. تحدثت جهاد أحمد، البالغة من العمر 28 عاما، وخريجة كلية التجارة، شعبة اللغة الإنجليزية، عن بداية اتجاهها لتصميم الهدايا، حيث قالت لـ"انفراد" "بدأت تصميم الهدايا بعد تخرجى بشهور، لحد ما ألاقى شغل مناسب ليا، والحمد لله لقيت شغل فى بنك، وبدأت أتطور وأعلم نفسي واحدة واحدة، واعتمدت على موهبتى، وقدرت أطور من أشكال الهدايا، وبدأت أتعرف بين الناس، وبمساعدة ماما وأخويا قدرت أوفق بين البنك وشغلى في تصميم الهدايا، وأصبحت هوايتي المفضلة اللي بفصل بيها من ضغط الشغل". وتابعت جهاد الحاصلة على الماجيستير فى التجارة، قائلة "شغلى في تصميم الهدايا أصبح الحاجة اللى بلاقى نفسى فيها، وبصمم بوكسات وبوكيهات جديدة ومختلفة لمناسبات مختلفة زى عيد الأم وعيد ميلاد أو تخرج أو الاحتفال بمولود جديد، وبهتم أعرف من اللى طالب هدية، هي لمين وإيه المناسبة، وابدأ أرسم في خيالى، هعمل إيه وأصمم الهدية إزاى، عشان أطلعها بشكل مختلف، ومؤخراً بدأت أعمل ديكور لحفلات الحنة بأفكار بسيطة وشيك". وعن استعدادها لتصميم هدايا عيد الأم هذا العام، قالت جهاد: "عيد الأم السنة دى حبيت يكون مختلف، فعملت بوكيهات بأشكال جديدة وبوكسات مختلفة جداً وجمعت بين الورد والشيكولاتة وصممت بوكيهات شيكولاتة، وبوكيه برفان، وبوكس بداخله فنجان عليه صورة أم كلثوم وكلمات من إحدى أغنياتها، لأن أساس هدية عيد الأم، إنها لغة تعبير عن الحب وكمان هديه بسيطة مش مكلفة، لكنها تعبير عن تقدير الابن لتعب والدته معاه". وعن الصعوبات التي تواجهها جهاد في عملها، قالت "الصعوبات اللى كانت فى شغلى الأول هو التوفيق بين الشغل فى البنك وشغلى فى تصميم الهدايا، لكن أخويا ووالدتى بيساعدونى، والحمد لله بقدر أوفق بين الاتنين، هو صعب عليا بس بحب الموضوع جداً وبقدر أطلع طاقتى فيه". أنهت جهاد حديثها معبرة عن أمنيتها فى المستقبل قائلة "نفسى فى المستقبل، إن شاء الله يكون عندى محل ورد وهدايا عشان انا بحب أبسط الناس جداً".