أتفه أسباب الخلافات الزوجية.. "ما قاليش يرحمكم الله وحلمت إنه اتجوز بعدى"

لا يخلو منزل من الخلافات الزوجية، سواء كانت مشاكل كبيرة حقيقة أو تلك التي تحدث أحيانًا لأسباب تافهة ولا تستدعي حدوث خلاف بين الطرفين، لكن رغم ذلك يتعامل معها الطرفين على أنها حقيقية، ثم بعد انتهائها يتحول الموضوع لمادة للسخرية من تصرفاتهما، ولأن السوشيال ميديا أصبحت مكانًا يشارك من خلاله البعض تجاربهم الحياتية، فقد تحدثت بعض الزوجات عن أتفه أسباب الخلافات الزوجية، وإليكم أبرزها. قالت "مروة": "في أول جوازي لقيته جاي بيتخانق معايا عشان لما عملت البيض رشيت الملح والفلفل عليه، وهو شايف إني كان المفروض أرشه على صفار البيض بس لكن الباقي لأ، وكانت خناقة كبيرة، وحاجة قمة الفراغ يعني." "عطست ومقاليش يرحمك الله، وقلبتها خناقة وقلتله مهو الاهتمام مبيطلبش، خليك مع صحابك والعب بابچى براحتك" كانت هذه من أطرف الخلافات التي روتها "فاطمة" عن مشاكلها مع زوجها. وكان خلاف "سارة" مع زوجها من الخلافات "التافهة" أيضًا، وعنها قالت: " كنت مقطعة الأناناس واحدة كبيرة وواحدة صغيرة، بس من بعدها مشفش الأناناس فى البيت وبياكله بره ويقشرة براحته." روت "إيمان" خلاف حدث بينها وبين زوجها قائلة: " كنت قايلاله هاتلي حاجة حلوة معاك وأنت جاي، ولما جه فتحها وقعد ياكل هو والعيال وأنا كنت في المطبخ، طلعت لاقيته مخلصها اتخانقت معاه وقعدت أعيط، وهو يبصلي ويضحك، وفي الآخر لقيته جايب الكيس ده للعيال وجايبلي اللي أنا عاوزاه وشايله، ساعتها اتكسفت أوي ومبقتش عارفه أخبي وشي فين، وقعد مسكهالي يومين ويقولي يا عيلة ياللي بتعيطي على الحلويات." وكان خلاف "نورا" مع زوجها بسبب حلم، وحكت القصة قائلة: "حلمت إنى موتت وهو اتجوز وسايب مراته تذل ابنى، وكان قاعد يقولها جعان، وكانت بتحطله أكل تحت السلم، وهو قاعد معاها، والواد يا قلب أمه عمال يخبط عليهم ويعيط، قومت من النوم سودت عيشته وكأنه عملها بجد." أما "ملك" فكان خلافها مع زوجها بسبب مزحة مع ابنتهما، وحكت القصة قائلة: "بنتي كانت صغيرة وأنا متعلقة بيها جدًا، وكنت أنا وهو شادين شوية مع بعض، فهو قرر يهزر مع بنتي ويخوفها ويشد شعرها عشان يضايقني، وكان بيلعب معاها يعني مش بيعمل دا بجد، روحت سايباله البيت وماشية." "كان نايم وسايبني، وبنتي مطلعة عيني لوحدي، روحت جيبت زمارة من لعبها وزمرت في ودنه عشان يصحى، وعينك ما تشوف إلا النور بعدها" كان هذا سبب خلاف "مريم" مع زوجها، التي أضافت قائلة: "كنت بهزر معاه عشان يقعد معانا بس قلبت بنكد." وقالت "آيات": "اتخانقت أنا وجوزي من يومين عشان كان مشغل فلاش الموبايل وأنا نايمة، ولما عاتبته قالي إنه بيشوف حاجة، بس طلع فاتح الفيس بوك ومشغل الفلاش عشان يغيظني بس." وكان خلاف "هند" مع زوجها مختلفًا، وعنه قالت: "اتخانقت أنا وجوزي عشان عملت الملوخية والبامية والمسقعة من غير أرز، لأني طول عمرى فى بيت بابا بناكلهم بالعيش، وهو مصمم إنهم بيتاكلو بالأرز." "اتخانقت أنا وجوزي خناقة جامدة جدًا علشان مكنش لاقي النضارة النظر بتاعته، وكان هيتأخر على شغله ونازل، وبعد ساعة خناق وبنجري أنا وهو والأولاد في الشقة، وقف قدام المراية يدور عليها لقى نفسه لابسها، وكانت نكتة جامدة." وكانت هذه هي قصة خلاف "ناصرة" مع زوجها. أما "آلاء" فقالت: "اتخانقت أنا وجوزي عشان كان بيدور على نص جنيه فكة وإحنا في الطريق، وزعل واتعصب بجد، اللي هو إزاي مش معاكي نص جنيه فكة؟!"