جلابية صعيدى وملاية لف.. لمياء تصمم عرائس مصرية 100%

تغزو أسواق الألعاب المصرية الدميات المستوردة من الخارج، والتى تشبه ملامحهم من عيون زرقاء وخضراء وشعر ملون الأجانب، حتى الأغانى التى تصدرها ثقافة أجنبية غريبة عن الطفل المصرى ذى الملامح العربية الشرقية الأصيلة، وهذا ما أدركته لمياء عليان، ففكرت فى تصميم عرائس مصرية 100% مستوحاة من الثقافة الشعبية وتشبه المصريين فى ملامحهم وملابسهم المختلفة المستوحاة من التراث الثقافى المختلف من الريف للحضر. وتحدثت لمياء عليان، خريجة كلية التجارة جامعة القاهرة، عن تصميمها للعرائس المصرية، حيث قالت لـ"انفراد": "أنا طول عمرى بحب شغل الهاند ميد، وفكرت فيه عشان أشغل وقت فراغى فى البيت، وعجبتنى فكرة تصميم عرائس كروشيه، وبدأت أدور على فيديوهات بموقع يوتيوب، عشان أتعلم تصميم العرائس، وبالممارسة أتقنت تصميم العرائس الكروشيه، وطرحتها على صفحتى على فيس بوك، وعجبت الناس، وده شجعنى أستمر أكتر فى تصميم العرائس". وتابعت: "كنت بحرص إنى أصمم عرائس مستوحاة من الثقافة المصرية، زى عروسة فلاحة أو إسكندرانية أو صعيدية، وعشان أقدر أعرف الملابس كنت بتفرج على أفلام قديمة وأبحث على الإنترنت، عشان أعرف أدق تفاصيل الملابس والإكسسوارات اللى كانت فى الخمسينيات والأربعينيات، وكمان عملت فنانين من زمن الفن الجميل زى الفنان الراحل عبد الفتاح القصرى، بجانب تصميمى لعرائس الكروشيه الشبيهة بالأشخاص الحقيقين، اللى بيطلبها منى العملاء سواء عرائس لأطفالهم أو زوجاتهم أو أى شخص عزيز عليهم". تشارك لمياء بعرائسها فى الكثير من المعارض الفنية، لطرح أعمالها من العرائس الكروشيه المستوحاة من التراث المصرى، والتى لاقت إعجاب الكثير من الأشخاص، وهذا ما أكدته قائلة: "كتير من الناس كانت بتحبطنى وتقولى إن مفيش حد هيشترى العرائس المصرية، وإن الكل عايز عرائس أجنبية زى باربى، لكن من خلال مشاركتى فى بعض المعارض الفنية، اكتشفت إن فيه ناس كتير حبت العرائس المصرية وبالذات الشباب، وده شجعنى أكتر إنى أصمم عرائس مصرية". تواجه "لمياء" بعض الصعوبات فى تصميمها للعرائس الكروشيه، والتى تحدثت عنها قائلة: "الصعوبات اللى بقابلها هى إن الحاجات اللى بحتاجها فى تصميم العرائس مش موجودة فى أماكن كتيرة زى الإكسسوارات أو الخيوط وغيرها من المواد الأساسية لتصميم العرائس". تحلم "لمياء" بتحقيق العديد من الأمنيات على أرض الواقع، وهو ما عبرت عنه قائلة: "نفسى يبقى فيه أماكن توفر المواد اللى بتتصنع منها العرائس الكروشيه، زى الإكسسوارات والأسلاك والخيوط وغيرها، خاصة إن فى الفترة الأخيرة، أصبح كتير من الناس بتشتغل فى تصنيع العرائس اليدوية، ونفسى يكون شغلى له بصمة زى أى مصمم فى أى مجال، واسمى يبقى مشهور على مستوى العالم".