الفانوس بقى إكسسوار مش بس للبلكونة.. مرمر تصمم حلى بروح رمضان ورموز الفن

منذ طفولتها وهى تعقد الخيوط الملونة وتزينها بالأحجار والألعاب الصغيرة لتصنع منها عقود وسلاسل ترتديها، وحرصت على تطوير موهبتها فى تصميم الإكسسوارات، مع إضافة لمساتها الخاصة فى تصميم العقود والأساور والتى أضافت إليها بعض صور المشاهير مثل كوكب الشرق أم كلثوم، كما صممت عقد بفانوس رمضان بمناسبة حلول الشهر الكريم. تحدثت مرمر المصرى، خريجة تجارة الأزهر، عن هوايتها فى تصميم الإكسسوار لـ" انفراد" قائلة: "بعشق تصميم الإكسسوارات من وأنا طفلة، واتعلمت تصميمهم من خلال فيديوهات موقع "اليوتيوب"، والمواقع الأجنبية المهتمة بالأنواع دى من شغل الهاند ميد، وبدأت الأول أعرف المقربين منى شغلى وأبعت لهم، وبعد كده الموضوع أتطور وبدأت أنزل معارض، أعرض فيها تصميماتى، وعملت جروب على الفيس بوك وصفحة على الإنستجرام عشان أعرض شغلى". تفضل مرمر تصميم بعض الإكسسوارات من صور الفنانين من رموز الفن فى مصر والعالم، حيث قالت :" أنا بشتغل فى جميع أنواع "منمنات الخرز "والأحجار وبستخدم فن الديكوباج، وبالنسبة لاستخدامى لصور الفنانين فى تصميم الإكسسوارات، لأنى بشوفهم رموز بتعبر عن الفن فى مصر، زى أم كلثوم، وكمان رموز الفن فى العالم زى الرسامة فريدا كاهلو ". تواجه مرمر بعض الصعوبات فى تصميم الإكسسوارات، والتى تحدثت عنها قائلة: "الصعوبات اللى بتواجهنى، إنى بشتغل بنوع دقيق أوى من الخامات وحجمه صغير وهو الخرز، وبلف كتير عشان ألاقى الجودة اللى أنا محتاجها وللأسف مش موجودة، لأن أكتر المحلات بتبيع أقل جودة من الخرز، وده بيستدعى منى مجهود مضاعف وتكلفة مضاعفة عشان أطلع شغلى بجودة عالية، و محترمة زى ما أنا عايزة". تحلم مرمر بتحقيق المزيد والمزيد من أحلامها على أرض الواقع والتى عبرت عنها قائلة :"بتمنى فى المستقبل، إن تصميماتى تلف العالم كله وتبقى موجودة فى كل المعارض العالمية ".