"إيمان" صممت فواصل المصحف بفوانيس وألوان مبهجة مناسبة لأجواء رمضان

أحبت الرسم منذ طفولتها، حتى أنها كانت تقضى وقت فراغها فى الرسم على الأوراق، فتارة ترسم زهورًا وأشجارًا ومظاهر طبيعية، وتارة أخرى تتخيل بعض الملامح لترسمها بألوانها، وحرصت على تنمية موهبتها الفنية بالتدريب والدراسة، حتى كبرت وبدأت ترسم على الخشب والميداليات، وبمناسبة شهر رمضان صممت عددا من فواصل القرآن الكريم. تحدثت إيمان حسن، خريجة كلية الآداب قسم اللغة العبرية، جامعة القاهرة، عن رحلتها الفنية، حيث قالت لـ"انفراد": "من صغرى بحب الرسم جداً وبحب أرسم بورتريهات، وعشان أتقنها أكتر أخدت كورسات لتعليم رسم البورتريه، وطبعاً كان نفسى أدخل كلية فنون جميلة، لكن للأسف ملحقتش ميعاد امتحان القدرات، فدخلت كلية الآداب، وبعد ما تخرجت، فكرت فى مشروع صغير، لأنى مش عايزة أضيع وقتى ومجهودى فى شغل روتينى، فعملت الحاجة اللى بحبها واللى أقدر أبدع فيها وأبتكر حاجات جديدة ومختلفة". رسمت "إيمان" على الخشب بألوانها المختلفة بعض مقاطع كلمات الأغانى، والتهنئة للمناسبات المختلفة مثل عيد الأم والأدعية الدينية، كما رسمت على الميداليات، وبمناسبة شهر رمضان صممت فواصل المصحف، بألوان مبهجة تساعد القارئ على تحديد الصفحة التى انتهى عندها أثناء تلاوته لكتاب الله، وتحدثت عن تصميماتها للفواصل، قائلة: "صممت فواصل المصحف بشهر رمضان، وتعتبر أكتر حاجة أطلبت منى الأيام دى، و ده فرحنى أوى". تواجه "إيمان" بعض الصعوبات فى عملها، والتى عبرت عنها قائلة: "الصعوبات اللى بتواجهنى، لما الأوردرات تيجى ورا بعض والناس بتبقى مستعجلة، فبضطر أعمل كله وبيبقى تعب أعصاب ومجهود طبعاً، خاصة لو الحاجة طلعت بايظة". وعن أمنياتها قالت إنها تتمنى تحقيق المزيد والمزيد من أحلامها على أرض الواقع والتى عبرت عنها قائلة: "نفسى فى المستقبل يبقى عندى مكان خاص بيا وله فروع مختلفة فى كل حتة".