سألنا البنات عن أكتر حاجة بتحسسهم بالأمان مع الراجل.. اعرف قالوا إيه

الأمان من أهم ما تبحث عنه الفتيات في علاقتهن بشريك حياتهن، فهو من وجهة نظر الكثيرات، يتفوق على الحب في الأهمية، لذا فبمجرد دخول أي علاقة عاطفية، تبدأ كل منهن في البحث عن الصفة التي تجعلها تشعر بالأمان مع شريك حياتها، والانسحاب في حال عدم توافرها في هذا الشخص، لذا طرحنا على الفتيات سؤال: "إيه مفهوم الأمان اللي بتدوري عليه في شريك حياتك؟" وإليكم إجاباتهن. "أكتر حاجة بتفرق معايا وبتحسسني بالأمان إن علاقة خطيبي بأهلي تكون طيبة وفيها ود واحترام من الطرفين لبعض، دا بيخليني أطمن إني في المستقبل هعيش مرتاحة، وإنه هيحترمني ويحترم أهلي وعمره ما هيقولي حاجة تضايقني عنهم، أو يمنعني عنهم بعد الجواز، لأن أهلي عندي هم أهم حاجة في حياتي." هكذا تحدثت "منة" عن مفهوم الأمان في شرك حياتها، وهي مازالت في مرحلة الخطوبة وتستعد للزفاف. أما "وفاء" بعد أن تعرضت لتجربة انفصال عن زوجها فقالت: "الوضع دلوقتي مختلف بسبب وجود بنتي، عشان كدا أول ما بيتقدملي حد أول حاجة بحس فيها بالأمان، هي إنه يكون بيحب بنتي، ودي أهم حاجة عندي دلوقتي، بعد كدا مهم عندي أحس إني مالية عينه وإن عمره ما هيفكر يتجوز عليا ويكتفي بيا في حياته." وتقول "مروة" وهي متزوجة منذ ثلاث سنوات: "أكتر حاجة بتحسسني بالأمان إن جوزي بيحبني بعيوبي قبل مميزاتي، وبيعرف يحتويني ويتعامل مع عصبيتي، بل بالعكس بيحاول طول الوقت ما يوصلنيش لمرحة العصبية، ودا بيخليني أحس قد إيه هو راجل ذكي وقادر يحتوي شريكة حياته ويسيطر على المشاكل في حياتنا، وبحمد ربنا إنه رزقني بيه." لأن الحياة لا تخلو من المشاكل في كثير من الأحيان، عبرت "يسرا" عن خوفها من الخلافات مع شريك حياتها المستقبلي قائلة: "بشوف ناس بمجرد ما تتعرض لمشكلة كبيرة يكون أول حل من وجهة نظرهم هو الانفصال، وأنا رأي إن الراجل اللي بيعمل كدا ضعيف، لأنه لازم يواجه مشاكله مع شريكة حياته ويحلها، عشان كدا طول الوقت لما بفكر في شريك حياتي، بدعي ربنا إنه يكون راجل قادر يحل مشاكلنا، ويتمسك بيا طول الوقت، وما يكونش أبسط حل بالنسباله لما نواجه أي مشكلة كبيرة هو إنه يسيبني." وأخيرًا اختصرت "نور" ببساطة مفهومها للأمان مع شريك حياتها في كلمة واحدة وهي "الاحترام"، وبررت ذلك قائلة: "لو أنا وهو بنحترم بعض، كل حاجة في الحياة هتبقى سهلة، خاصة إن فيه بعض الرجالة بيشوفوا إن احترام الست ليهم أمر طبيعي، لكن في المقابل هو يعاملها على مزاجه واحترامه ليها مش في باله، ودا عمره ما يحسس أي ست بالأمان مع النوع دا من الرجالة."










الاكثر مشاهده

رابطة العالم الإسلامى تنظم غداً مؤتمر "بناء الجسور بين المذاهب الإسلامية" فى مكة

د.العيسى يلتقي رئيس جمعيات الصليب الأحمر والهلال الأحمر على متن سفينة "أوشن فايكينغ"

10 أسئلة وإجابات حول تعديلات قانون تملك الأجانب للأراضى الصحراوية.. برلماني

الشيخ العيسى: يمكن للقيادات الدينية أن تكون مؤثرة وفاعلة فى قضيةٍ ذات جذورٍ دينية

رابطة العالم الإسلامي تُدشِّن برنامج مكافحة العمى في باكستان

جامعة القاهرة تنظم محاضرة تذكارية للشيخ العيسى حول "مستجدات الفكر بين الشرق والغرب"

;