السحر عمل فيكوا إيه؟ سؤال انتشر بين فتيات مواقع التواصل الاجتماعي، وبدأت كل منهن في مشاركة تجاربهن مع السحر والمس من وجهة نظرهن، وروت كل منهن قصتها، وشاركت الكثيرات قصصهن على موقع فيس بوك مع الجن، وانقسهم الآراء بين مؤيد ومعارض، وإليكم أبرز القصص.
تحدثت "صافي" عن تعرضها للسحر قائلة: "قعدني سنة ونص مش بتحرك من مكاني، وكان بيعدي عليا عيد ميلادي، وكانوا بيحتفلوا وأنا جنبهم في السرير ببصلهم بس مش بتحرك كده، بس متسيبوش نفسكم للحاجات دي عشان هتدمروا بمعني الكلمة، وصلوا وخلوا إيمانكم بربنا كبير، ويارب محدش يشوف اللى أنا شوفته أبدًا، وخليكوا متأكدين إن لو اجتمع الجن والإنس على أن يضروك بشيء لن يضروك إلا بشيء قد كتبه الله لك.
وكانت رواية "هاجر" مختلفة قليلًا، حيث روت أنه مس خالتها، وجعلها تعاني بشكل كبير، وقالت: "السحر بيخلي خالتو تعبانة دايما وبالأخص في الفترة اللي جوزها بيجي فيها من السعودية، ودايمًا خناقات وتقوم تلاقي جسمها مليان خرابيش، وقامت فى مرة وشها مدهون دم، وكانت ممكن ساعات تمشي بدون نقاب بهدوم البيت، ومتعرفش كانت فين، وكانت تلاقي الحاجات بتاعتها تختفي او متكسرة، وربنا يشفيها يارب."
وجاء رأي "ميار" مهاجمًا للمهتمات بهذا النوع من الأفكار قائلة: "هو أي حد يحصله حاجة في حياته يقول سحر وعمل؟؟! يعني ده مش قضاء من ربنا ومكتوب وانتي مش بتعملي أي سيئات وتستاهلي أي حاجة تحصلك مثلا؟! بجد ربنا يعينكم على تفكيركم."
"أول ما عرفت اتصدمت إن في حاجة في العصر اللي وصلناله ده اسمها سحر، في الأول اتأثرت جدًا إني كنت ضحية ليه، وبعد فترة وبعد قراية كتير في الدين فهمت إنه ابتلاء وزيه زي المرض، وعلاجه القرآن مفيش غيره، بس مع الوقت اكتشفت إنه نجاني حتى لو السحر ده ليه توابع فكفاية إن دي إرادة ربنا اللي مبيعملش غير الخير."
وواجهت "يمنى" مشاكل لم تعلم وقتها إذا كان السحر أو المس هو السبب فيها أم لا، وعنها قالت: "أنا مش عارفة دا كان سحر ولا مس جسدي، وكان فيه وقت دايمًا لازم أنام فيه بليل وبحلم بأحلام وحشة لازم تنتهي بموتي موتة صعبة، وفي الآخر شخص واحد هو اللي بيموتني وكان راجل كنت بحبه، وكنت بشوف ناس ميتة أدامي بجد وجسمي يشنج وأقعد أقولهم هموت الحقوني."
وأخيرًا وقفت "منة" في صف المستنكرات من الفكرة، وقالت إن الأمر بالنسبة لها غريب، وأنها مقتنعة طوال الوقت إن الله سبحانه وتعالى هو الحامي والحافظ، وأن قراءة القرآن والقرب من ربنا يحمي من أي ضرر في الدنيا، لذا فإن القرب من ربنا هو الحل لكل المشاكل المتعلقة بالجن والسحر وغيرهما.
