الخلاف مش آخر الدنيا ولو مترددة ما تمشيش.. حاجات لازم تعرفيها قبل الانفصال

"امتى تاخدى قرار الطلاق؟" سؤال طرحته إحدى السيدات على إحدى المجموعات النسائية، تحاول من خلاله معرفة ما هو الوقت الصحيحلاتخاذ خطوة كبيرة مثل الطلاق، لتجيبها الكثير من السيدات، بخطوات مهمة يجب أن تتخذها قبل أن تتخذ هذا القرار الصعب. مفيش بيت من غير مشاكل قالت سلمى "الحياة بعد الطلاق مش أسهل حاجة وسيبك من أى حد يقول لك غير كدا أنا مطلقة ومش بتكلم عن كلام سمعته، الطلاق عشان يحصل لازم يكون الحب انتهى لو منتهاش هتعيشى فى جحيم خاصة لو عمرك صغير يعنى لسه فى العشرينات، صراع ما بين مش شايفة نفسك مع حد غيره وكان ممكن أغيره وما بين بس طباعه وأهله صعب، لازم تعافرى وتتعبى عشان حبك ويوم ما تحسى إن الحب ده مش موجود يوم ما تقولى أنا تمام كدا وعملت اللى عليا قدام ربنا عشان العلاقة اللى ربنا وصانا إننا نحترمها تكمل لكن غير كدا مفيش بيت مفيهوش مشاكل ومفيش بيت مفيهوش كلام بيوجع من الطرفين وأى حد يفهمك عكس كدا يبقى إنسان مش صريح والحياة مسئولية". فترة راحة قبل أخذ القرار وأضافت آية "كنت بدرس كورس عن العلاقات واتعلمت فيه إنك قبل ما تقرر تنفصل عن شريك حياتك لازم تدى لنفسك سنة، سنة كاملة تحاول فيها بجد تصلح كل اللى بينكم سنة تعيد ترتيب العلاقة". فيما نصحت سلمى "كان مرة لايف كوتش بيقول إنك لو تقدرى تجربى شكل الحياة بعد الطلاق حاولى إنك مثلا تطلبى تروحى بيت والدك أسبوع أو اتنين وحتى هو يعرف إنك ممكن تضيعى منه، فالأمور إما تتصلح أو تحسى إنك فعلا مرتاحة". استشارى علاقات زوجية وكتبت ندى: "أنا رأيى تروحوا استشارى علاقات زوجية هيساعدكم جدا، الطلاق مش سهل ده من أصعب الحاجات اللى ممكن تمرى بيها فلو فى أى أمل حاولى تانى وتالت وعاشر، والاستشارى ممكن يقولك على طريقة تتعاملى بيها". وجود الحب وأكدت هدى أنه فى حالة وجود الحب حتى مع كثرة المشاكل لا يجب أخذ قرار الطلاق قائلة "متطلقيش وإنتى بتحبيه وهو بيحبك والخلافات مش مصيبة، اتطلقى أول ما الحب يخلص حتى لو مفيش خلاف لو اطلقتى وإنتى بتحبيه هتندمى". الاستقرار المادى وأضافت منى "عندى نصيحتين، الأولى لازم تكونى مستقرة تماما ماديا، وشغلك وقبضك يكون بيغطى مصاريفك الشهرية بدونه، غير كدا صعب لإنك بتجازفى بولادك، اشتغلى واقفى على رجلك من الآخر، وخلى معاكى الفلوس اللى يوم ما تطلقى تخليكى مش محتاجة لحد، ثانيا طول ما إنتى مترددة متمشيش لأنك مجبتيش آخرك ولا حاجة يوم ما تجيبى آخرك هتمشى لوحدك مش هتسألى حد".