سألنا البنات ليه الزواج يفشل رغم الحب؟.. "أسطورة هتيغير عشانى" المتهم الأول

الزواج عن حب هو هدف كل فتاة، ففى الوقت الحالى تبتعد الكثير من الفتيات أن الزواج التقليدى أو زواج الصالونات كما يطلق عليه، فدائما ما تتم المقارنة بين الزيجات التقليدية والزواج عن الحب. وعلى الرغم من أن فشل الزواج قد يكون له أسباب عديدة، قد لا تكون طريقة التعارف أو الزواج واحدة منها، إلا أن الكثير من الفتيات قد يصدمن عند سماعهم لقصة فشل زواج بعد قصة حب كبيرة، وفى أحدى الجروبات النسائية، سألت إحدى الفتيات عن سبب فشل الزواج قائلة :"ايه اللى ممكن يخلى جوازات تفشل فى وقت قصير بعد قصص حب دامت لسنوات؟"، وجاءت إجابات الفتيات كالتالى: غياب التفكير المنطقى: أجابت هبة قائلة :" قصص الحب العنيفة بتخلي التفكير المنطقي تقريبا معدوم، زي المهم نبقى مع بعض مش مهم الفلوس مش مهم أي حاجة تانية وأول ما يبقوا مع بعض مع المسئليات يبدأوا يحسوا أنهم أتورطوا وكل طرف يحمل التاني المسئولية، ومثلا لو مشكلة مادية يبدأ الزوج يلومها ويقولها ما انتي قولتي هتستحملي وهي تحس أنه هو ضحك عليها ومرسملهاش الصوره صح". ووافقتها إنجى قائلة :" الناس بتحب وتلغى عقلها وبيبقى مشاعرها بتحركها انها لازم توصل لخطوة الجواز، وده الهدف وكل حاجة هتتصلح بعدها، وده خيال علمى مفيش حد بيتغير بعد الجواز ومفيش حاجة أسمها الغى عقلى عشان بحب الشخص ده وأتنازل عشان الحب". غياب التفاهم والاحترام: وأكدت كريستسن أن التفاهم والاحترام من أهم مقومات نجاح الزواج قائلة :"الحب وحده لا يكفى، التفاهم والأحترام واللغة والتواصل والجهود المبذول أهم من الحب بكتير". العادات والتقاليد: وقالت دنيا:" الزواج ممكن يفشل رغم الحب لأن للأسف المجتمع كله معتبر الجواز ده نهاية المشوار وكله عايز يتجوز علشان "يرتاح" فمحدش بيحاول يبذل مجهود بعد الجواز، رغم أن الفرح ده هو أول خطوة في مشوار حياة مشتركة لازم نتعب في أولها على ما نتعود على طباع بعض جوة البيت وبعد فترة بقى هنرتاح". التنازلات: فيما رأت دينا أن التنازلات قد تكون سببا فى فشل الزواج قائلة :"بسبب التنازلات، الحب بيخليكي تضحي وتتغاضي أنت والطرف التاني، فبتستحملوا لحد ماتوصلوا للنهاية مع المسؤليات والمشاكل، إنما الصالونات ممكن تكون بتعمر اكتر، لأن الاتنين بيدخلوا بعقلهم مش قلبهم وبيختاروا الشخص الأنسب وبيكون في أحترام ورغبة يكملوا، الحاجات دي لو موجودة في الحب بيكون أسعد جواز". - هيتغير عشانى بعد الزواج: وأجابت مريم قائلة :" واحدة من الأسباب العشم في التغيير، أننا نبني أحلامنا كلها علي حد مش مناسب وأحنا فاكرين إننا هنعرف نخليه متفصل علي مقاسنا وده لوحده فشل، بس هو في الحقيقه عمره ما كان مناسب وإلا مكنش حد فينا قرر يمشي مهما عدت سنين".