من استورجى لكاتب.. أحمد حقق حلمه ويرد على المتنمرين: فخور بشغلى القديم

طريق الألف ميل يبدأ بخطوة..جملة نعرفها جيدا وتجعلنا ندرك أن النجاح قد يتطلب تحقيقه المرور بالكثير من المحطات، وتثبت أن النجاح يمكن أن يبدأ بخطوة صغيرة، طالما توفر التصميم والسعى وعدم الاستسلام لظروفنا الحياتية المختلفة، وخيبات الأمل التي قد نمر بها. أحمد صابر شاب استطاع أن ينفذ مقولة "طريق الألف ميل يبدأ بخطوة"، وعلى الرغم من سنه الصغير، حيث يبلغ من العمر 28 عاما، استطاع أن يطور من نفسه ومن إمكانياته ليتحول من "صنايعى" إلى كاتب ومؤلف يشارك بمعرض الكتاب هذا العام. أحمد أصبح حديث السوشيال ميديا، بعد أن قام بنشر بوست عبر أحد صفحات موقع الفيس بوك، مرفقا بصورتين له خلال عمله كصنايعى، وصورة له خلال مشاركته بمعرض الكتاب، مصحوبا برسالة وجهها لأحد المتنمرين الذى هدده بنشر صورته خلال عمله القديم، وأعرب خلاله عن فخره بعمله القديم وبأسرته التي ربته على الكفاح وكانت سبب في نجاحه. وعن مسيرته قال الشاب أحمد لـ "انفراد" :"أول حاجة اشتغلتها في حياتي كانت في محل أدوات صحية وبعدين دخلت صنعة الأسترجي وانا في ثانوي، وبقيت بشتغل استرجي اشتغلت حوالي 8 سنين فيها لغاية ما بقيت صنايعي". وتابع قائلا :" بعد ذلك دخلت معهد حاسب آلى، وأخدت شهادتي وفتحت محل صيانة كمبيوتر صغير واتجهت لدراسة علم النفس وبدأت أخد كورسات واعمل فيديوهات وأكتب بوستات علي فيس بوك وأعمل صفحة باسمى لغاية ما الكتابة الكبيرة هدي سالم شافت كتاباتي وبدأت تتابعني وهي اللي أقنعتني أعمل كتاب وتحولت من صنايعي لكاتب وكتابي دلوقتي موجود في معرض القاهرة للكتاب الحمد لله، والكتاب عن كيفية اختيار شريك الحياة بطريقة صحيحة، واسمه جوازة العمر". وعن سبب كتابته للبوست المنتشر على صفحات التواصل الاجتماعى، قال أحمد :"حد بعتلي رسالة تنمر عليا فيها وبعتلي صورتي وأنا استورجي وقالي تحب انزلك الصورة دي ولا انت نسيت اصلك، أول ما شوفت الصورة حسيت بالتطور اللي انا بقيت فيه وقولت لازم الموقف ده يكون رسالة لكل متنمر، وخصوصا اني الحمد لله أنا حد مش بتكسف من أي حاجة عملها في حياته وبيعرف يقدر ذاته ويثق في نفسه كويس، بس في نفس الوقت اتخضيت إني حواليا ناس ممكن تكون بتحقد عليا وعايزة تهدمني". ووجه أحمد رسالة للمتنمرين والذين يحاولون هدم من حولهم، قائلا :"ربنا بيقول في القرآن وقولوا للناس حسنا، فأنتم كده بتخالفوا أمر من أوامر الله، واختم بحديث الرسول عليه الصلاة والسلام إن أشر الناس منزلة يوم القيامة من يتقيه الناس مخافة لسان، وأن ربنا عمره ما هيغفرلكم غير لما الناس اللي انتم بتتسببوا في أذيتهم نفسيا تسامحكوا". وتابع أحمد موجها رسالة للشباب :"امسكوا في أحلامكم وجربوا كتير، وان الله لا يضيع أجر من أحسن عملا واقولهم كمان محدش يعلق شماعة فشله علي البلد وظروف البلد لان ربنا بيقول وان ليس للإنسان الا ما سعي وإن سعيه سوف يري، ودي الآية اللي انا ماشي بيها في في حياتي".