سألنا البنات: بتعترفى بالصداقة بين الرجل والمرأة من غير حب؟

تعتبر الصداقة من أساسيات الحياة، فهى من أسمى وأصدق العلاقات بين الناس، وربما نشعر فى كثير من الأحيان أن الحياة صعبة فى ظل عدم وجود أصدقاء أو لمجرد ابتعادهم، فالصداقة تعطى نكهة مختلفة للحياة. وعلى الرغم من أهمية الصداقة، إلا أن الأراء قد تختلف حول صداقة بين الرجل والمرأة، فالبعض يرى أنه لا يوجد أى مشكلة فى أن يصبح الرجل صديق مقرب للمرأة، ويرى الآخرون أن هذه الصداقة من الممكن ان تتطور إلى حب فى النهاية، وهو ما دفعنا لسؤال عدد من البنات عن إمكانية نشوب علاقة صداقة بين الرجل والمرأة دون الوقوع فى الحب، وجاءت الردود كالتالى: نعم ولكن... قالت مرثا :"طبعا ممكن لأننا بشر ونقدر نتحكم فى مشاعرنا، وممكن نبقى أصحاب وأخوات كمان طالما محددين من الأول شكل العلاقة، وعندنا عقل هو اللى بيقودنا". وعن رأيها فى الصداقة بين الرجل والمرأة قالت سارة :"أنا بشوف أن مفيش حاجة اسمها صداقة بين رجل وست، ممكن تبقى زمالة فى إطار العمل فقط، لكن فى العموم لازم هتتحول الصداقة دى لمشاعر حب وده ممكن يسبب الكثير من المشاكل". "ممكن بشروط" وأضافت منى :"لحدوث صداقة بين الرجل والمرأة يجب توفر النضج النفسى والعاطفى، لو موجودين هيبقى عندهم القدرة على التحكم فى نفسهم، وكمان هيعرفوا يحكموا على الأمور بطريقة صحيحة، وكل واحد هيبقى عارف حدوده كويس". وعن رأيها قالت منال:"مافيش صداقة بين الرجل والمرأة، مهما حافظا على مشاعرهم، تقربهم من بعض هيخليهم يحبوا بعض، وتتحول بعد الصداقة لحب بعد كده، لكن فى زمالة بينهم فى حدود الدراسة أو العمل". وأكدت إيرينى أنه الافضل أن تكون الصداقة من نفس النوع قائلة :"ممكن غصب عنهم من كتر ما هيبقوا فاهمين بعض، أو بيلجأوا لبعض فى أى مشكلة، هيقى فى حوار بينهم، وممكن يرتبطوا بوجود بعض، وممكن يحبوا بعض، الأفضل أن الصداقة تكون من نفس النوع على الأقل هاتفهمنى أكثر تحس بيا لو صديقة كويسة". وقالت مريهان :"فى فرق كبير بين الأصحاب والزملاء والصداقة القوية، فى حالات بسيطة أوى بتكمل صداقة الرجل والمراة، وده بيعتمد على نضجهم وتفكيرهم، لكن الأغلب بتقلب بحب من طرف واحد يعذب حد فيهم أو هما الأثنين".