حب ولا صالونات.. سألنا البنات عن طريقة الزواج الأنجح: مش مهم مكان المقابلة

"عن حب ولا صالونات" سؤال يوجه إلى أي شخص بمجرد إعلان ارتباطه بشريك حياته، ليبدأ في سرد طريقة لقائه بالشخص الذى قرر أن يكمل معه بقية حياته، وعلى الرغم من أن أهم شيء في الزواج هو التوافق بين الخصين، إلا أن كثير من الفتيات ترفض فكرة زواج الصالونات. وعلى الرغم من وجود أكثر من عامل قد يؤثر على نجاح الزواج، أو يحدد مدى نجاحه مثل التوافق والتفاهم وطريقة التفكير المتقاربة، إلا أن الكثيراث قد ترفض زواج الصالونات، لاعتبارها طريقة تقليدية وقديمة للتعارف بين الطرفين، واليوم مع خروج الفتيات للدراسة والعمل فهناك فرصة لمقابلة الكثير من الأشخاص التي ربما يكون من بينهم شريك حياتهن، وهو ما دفع إحدى الفتيات لطرح سؤال عبر أحد صفحات موقع التواصل الاجتماعى النسائية، عن مدى نجاح الزواج بناء على طريقة التعارف سواء صالونات أو حب، وجاءت ردود الفتيات كالتالى: قالت روفيدا :"مفيش حاجة اسمها صالونات وحب والجو ده، الصالونات ممكن يقلب بحب ومشاعر وحاجات لطيفة في الآخر و"الحب" ممكن تلعنوا اليوم اللي شوفته فيه بعض في الآخر برده، وده بيعتمد على الشخص اللي معاكي وبس". وأضافت هبة :"الانجح إنك تكوني إنسانه كويسة وعارفة أنتي بتتجوزى ليه وعاوزة شريك حياتك صفاته إيه، وتشتغلي علي عيوبك، وهو كمان يكون كده، علشان اليومين دول الناس بتتجوز وهما مش فاهمين أصلا المسئولية وف الاخر بنشوف نماذج غير ناجحة". وأجابت مريم قائلة :"الأول كنت مقتنعة أقتناع تام أن زواج الصالونات ده افشل شئ في الكون، بس طلع أن المنظور ده غلط واللي أثبت أنه غلط، حاليا في ناس كتير بتتزوج عن حب بس بينتهي بها المطاف للطلاق، وفي ناس ماكنوش يعرفوا بعض وناجحين جدا في علاقتهم، ومعظم أهلنا تزوجوا صالونات ولحد أوائل الألفينات كان كل فين وفين لما نسمع أن حد تطلق، للأسف التوعية هنا عندنا في مصر واخدة اتجاه ثانى خالص في نقطة الزواج ،المفروض يكون في مكان يأهل الشباب ويعدهم لتكوين أسرة كويسة ،و ساعتها عن حب أو صالونات مش هيفرق". وتابعت ياسمين قائلة :"هو فيه نقطة بس مين قال ان الصالونات بيبقي مش عن حب، أنتى بتاخدى فترة على ما تتعرفى على الشخص المتقدم، لحد ما بتأخدوا قرار إتمام الزواج، وفي الحالة دي يبقي انت برضة متزوجة عن حب، وقعدتوا فترة بتحبوا بعض زيها زي اللي بيتعرفوا علي بعض في الأول وبعد كدة نفس القصة بتمشي، أنا بشوف أن هي هي". وقالت كريستين :"بكره المقارنة دى جدا، في زيجات صالونات نجحت، وفى قصص حب فشلت والعكس صحيح كمان، مش مهم مكان المقابلة المهم بنى آدم يناسبك وتحققي معاه اللي أنتى عاوزاه من الزواج".