"دينا" بتجدد قطع الأثاث القديمة بفن "زنتانجل" عشان تحسن النفسية والديكور

عندما تمر السنوات على بعض قطع الأثاث من مقاعد ومنضدة وتتحول إلى قطع قديمة بالية، يلجأ البعض للتخلص منها، سواء ببيعها أو بإلقائها خارج المنزل، لكن دينا شاهين، كان لها وجهة نظر مختلفة في التعامل مع الأشياء القديمة، وهى تجديدها من خلال الرسم عليها بفن " زنتانجل "، ليساعد في تحسين الحالة النفسية للإنسان. تحدثت الفنانة، دينا شاهين، خريجة كلية الحقوق، عن محاولتها لتجديد قطع الأثاث القديمة بالرسم عليها، حيث قالت لـ" انفراد":" أنا اشتغلت خلال الدراسة، بمهنة إدارية، ولكن حسيت إنى مش مبسوطة ومش بعمل حاجة بحبها، فضلت أقعد سنة في البيت و بدأت أفكر في اللى نفسى أحققه في حياتى، وكنت ببحث على الإنترنت، لقيت فن هندى أسمه " زنتانجل"، وأسمه فن التأمل في الهند، وأتفرجت على نماذج مختلفة من الرسومات وعجبتنى، وفكرت أرسمها، ولقيت نفسى بعرف وبدأت أرسم وأعلم الناس إزاى ترسمها بالخطوات". تابعت :" لقيت ترابيزه قديمة عندي عملت سيرش عن الخامات اللى ممكن أقدر أدهن بيها الترابيزة، وفكرت وقتها أرسم عليها فن" زنتانجل"، وصورت الترابيزة قبل وبعد الرسمة، ولقيت تفاعل حلو أوى من الناس عندى على الفيس بوك، وناس بتطلب منى أغير شكل عفشها القديم، بالرسم عليه، و ده شجعنى أشتغل كده، وأعمل صفحة على مواقع التواصل الإجتماعى، وأنشر شغلى قبل وبجد التجديد". استطاعت "دينا" أن تتقن فن " زنتانجل"، وترسمه على مختلف قطع أثاث المنزل، وليس فقط المنضدة، حيث قالت :"قدرت أرسم رسومات كبيرة، على قطع أثاث مختلفة، سواء خشب أو خزف أو زجاج فخار، وبدأت أعرض قطع ديكور منقوش عليه النوع ده من الفن وأبيعه بجانب شغلى في تجديد قطع الأثاث، وأعمل ورش وأدرس النوع ده من الفن". وعن الألوان التي تستخدمها دينا في رسم الـ " زنتانجل"، قالت :"بشتغل بألوان أكليريك ثابتة، ينفع يترسم بيها على الخشب، و بثبتها بورنيش فلوت، عشان كده بتكون ضد الخدش، ومش بتروح بالماء". وعن الرسومات التي ترسمها دينا على قطع الأثاث، قالت :"برسم أي رسمة وخاصه فن "زنتانجل"، حسب الرسمة اللى بيختارها العميل". تحلم دينا بتحقيق العديد من أحلامها على أرض الواقع، والتي عبرت عنها قائلة :" بحلم أفتح جاليري خاص بيا، وأكون أشهر مدربة لفن " زنتانجل"".